Papa: sot në Kishë kemi pranverën eukaristike. Të përtërihet feja në praninë reale
të Krishtit në Eukaristi.
“Sot në Kishë kemi një pranverë eukaristike: sa shumë njerëz ndalet në heshtje para
Tabernakullit të Shenjtueshmit Sakrament të Eukaristisë, për të ndenjur në bisedë
dashurie me Jezusin!”. Kështu pohoi mes tjerash Papa Benedikti në audiencën e sotme
të përgjithshme, katekizmin e së cilës ia kushtoi “një figure femërore, pak të njohur,
së cilës Kisha duhet ti jetë mirënjohëse shumë, jo vetëm për shenjtërinë e jetës së
saj, por edhe sepse, me zell të madh, ka kontribuar në themelimin e njërit prej solemniteteve
‘liturgjike më të rëndësishme të vitit, atë të Korpit të Krishtit’”. Është fjala
për shën Gjulianën nga Liezhi, e cila lindi mes 1191 e 1192 e vdiq më 1258. “Eshtë
ngushëllues të dish – tha Papa duke folur për festën e Corpus Domini (Korpin e Krishtit)
– që jo pak grupe të rinjsh kanë rizbuluar bukurinë e lutjes e të adhurimit para të
Shenjtueshmit Sakrament të Eukaristisë”. Ati i Shenjtë Racinger këndej uroi që kjo
“pranverë” eukaristike të “përhapet gjithnjë më shumë në të gjitha bashkësitë kishtare
famullitare, në mënyrë të posaçme në Belgjikë, atdheun e shën Gjulianës”. Papa kërkoi
prej besimtarëve e Kishës të përtërihet “feja në praninë reale të Krishtit në Eukaristi”,
ku – shpjegoi Përmbledhjen e Katekizmit të Kishës Katolike - Jezu Krishti “është
i pranishëm në mënyrë të vërtet, reale, thelbësore: me korpin e gjakun e vet, me
shpirtin e hyjninë e vet”.