Католікі і шыіты: супрацоўніцтва павінна дапамагчы адказаць на сучасныя выклікі
“Рэлігія і грамадства
сёння - хрысціянскія і мусульманскія перспектывы” – над гэтай тэмай разважалі 8-11
лістапада ў Тэгеране прадстаўнікі Арганізацыі ісламскай культуры і кантактаў і Папскай
рады па міжрэлігійным дыялогу. Прэс-бюро Апостальскай Сталіцы апублікавала сёння паведамленне
з гэтага ўжо сёмага такога тыпу сімпозіўма.
Сустрэча ў іранскай сталіцы прайшла
пад старшынствам доктара Моххамада Бакера Хорамшада, прэзідэнта Арганізацыі ісламскай
культуры і кантактаў і кардынала Жан Луі Тарана, старшыні Папскай рады па міжрэлігійным
дыялогу. Удзельнікі разважалі над аспектамі суадносін рэлігіі і грамадзянскай супольнасці
з пунктаў гледжання католікаў і мусульман-шыітаў: філасофскім, тэалагічным і гісторыка-прававым.
Удзельнікі
пагадзіліся з тым , што “вернікі і рэлігійныя супольнасці, на аснове іх веры ў Бога,
адыгрываюць асаблівую ролю ў грамадстве разам з іншымі грамадзянамі”, а таксама, што
“рэлігія мае ўласцівыя сацыяльныя аспекты, якія дзяржава забавязана паважаць. Гэта
спрыяе таксама інтарэсам грамадства, таму рэлігія не можа абмяжоўвацца да прыватнай
сферы”. Адначасова “вернікі закліканы супрацоўнічаць у пошуку агульнага дабра на
аснове трывалай сувязі паміж верай і розумам”.
Паводле дакумента, супрацоўніцтва
хрысціян і мусульман, а таксама вернікаў іншых рэлігій і ўсіх людзей добрай волі,
павінна дапамагчы адказаць на сучасныя выклікі, садзейнічаць падтрымцы маральных каштоўнасцяў,
справядлівасці і міру, абароне сям'і, ахове навакольнага асяроддзя і прыродных рэсурсаў.
У
паведамленні адзначаецца, што “вера па самой сваёй прыродзе, патрабуе свабоды”. Такім
чынам, рэлігійная свабода, як неад'емнае права на чалавечую годнасць, заўсёды павінна
паважацца асобамі, прадстаўнікамі грамадства і дзяржавай.
Пры выкананні гэтага
фундаментальнага прынцыпу неабходна прымаць да ўвагі культурныя і гістарычныя абставіны
ў кожным грамадстве, калі яны не ўваходзяць у супярэчнасць з чалавечай годнасцю.
Удзельнікі
сустрэчы звярнулі ўвагу таксама на тое, што адукацыя маладога пакалення павінна быць
заснаваная на пошуку праўды, духоўных каштоўнасцяў і доступу да ведаў.
Прадстаўнікі
Апостальскай Сталіцы і іранскіх шыітаў, прызнаючы падабенства і паважаючы законныя
адрозненні, падкрэслілі неабходнасць працягу шчырага і плённага дыялогу.