Vatikani në HD, drejt faqes së re të internetit për të gjitha mediat e tij
(16.11.2010 RV)Vatikani po punon për realizimin e faqes së re të internetit,
në të cilën do të bashkohen, në formë multimediatike, burimet e ndryshme të lajmeve
nga Selia e Shenjtë: Salla e Shtypit, gazeta “L’Osservatore Romano”, Radio Vatikani,
Qendra Televizive e Vatikanit dhe agjensia FIDES. Lajmin e dha sot kryetari i Këshillit
Papnor për Komunikimet Shoqërore, imzot Klaudio Maria Çeli, gjatë paraqitjes së autobuzit
të ri regji për xhirimin me cilësi të lartë, apo HD (High Definition) në konferencën
e shtypit me temë “Teknologji të reja në shërbim të komunikimit të Selisë së Shenjtë”. Është
ende shpejt të përcaktohen kohët për funksionimin e këtij portali të ri e siç shpjegoi
imzot Çeli, ka shumë propozime edhe për emrin, ndoshta “Vatican News”. Kjo faqe e
internetit ka për qëllim koordinimin e punës ndërmjet mediave të Selisë së Shenjtë,
duke ruajtur autonominë e secilës. Përsa i përket regjisë së re të lëvizshme u
sqarua se blerja e saj u mundësua me ndihmën e Kalorësve të Kolombit dhe të Sony-t.
Është një kosto e konsiderueshme e ndokush pyeti edhe pse është marrë përsipër? Të
dëgjojmë përgjigjen e imzot Klaudio Maria Çelit: “Përgjigjia e vërtetë për këtë
pyetje të ligjshme gjendet, besoj, në një pjesë të Këshillimit të fundit Apostolik
të Benediktit XVI “Verbum Domini”, ku lexohet: “Marrëdhënies ndërmjet Fjalës së Zotit
dhe kulturave i bashkangjitet edhe rëndësia e përdorimit të kujdeshshëm e inteligjent
të mjeteve, të vjetra e të reja, të komunikimeve shoqërore” (n.113). Ja arsyeja e
vërtetë e këtij investimi”. Blerja e regjisë së re i përgjigjet kërkesës për
një sinjal gjithnjë e më cilësor, siç nënvizoi drejtori i Qendrës Televizive të Vatikanit,
atë Federiko Lombardi: “Ishim të detyruar. Nganjëherë duhet ta mbrojmë këtë
shpenzim para atyre, që mendojnë se është tepër ambicioz, ose tepër i madh. Por nuk
mund të mos e bënim. Në të kundërt, imazhi i Papës në vitet e ardhshme do të dilte
gradualisht nga bota televizive”. Presidenti i Sony-t për Italinë, Gildas Pelliet
kujtoi disa nga karkateristikat e regjisë së lëvizshme, realizuar krejtësisht në Itali,
me mjetet më të sofistikuara, që ofron sot tekonologjia: “Në veçanti, automjeti
i lëvizshëm është i gjatë 13,9 m, i gjerë 2,5 m dhe i lartë 4 m. Mund të zgjerohet
dyfish me anë të një komande hidraulike, që na lejon të shfrytëzojmë një hapësirë
shtesë në zonën e prodhimit. Ndahet në 4 zona operative, ajo audio, salla e aparateve,
regjia e parë dhe regjia e dytë për regjistrimin e videove dhe për kontrollin e komandimin
e telekamerave”. Nesër, pas audiencës së përgjithshme, Papa Benedikti XVI do
ta bekojë regjinë e re, e cila do të jetë operative për Krishtlindje. Kjo regji është
gati edhe për zbatime të ardhshme në 3d (tripërmasëshe) e sjell me vete të reja të
tjera të rëndësishme. Arkivi televiziv i Vatikanit do të integrohet me xhirime me
cilësi të lartë HD. Brenda disa muajve, ngjarjet e Selisë së Shenjtë do të transmetohen
me këtë cilësi drejtpërdrejt nga Qendra Televizive e Vatikanit në zonën e Romës, në
kanalin dixhital tokësor, që i ka takuar Qytetit të Amshuar, mbi bazën e marrëveshjeve
ndërkombëtare. Risi tjetër është edhe rinovimi i faqes së internetit “Pope 2 you”
(Papa juve), realizuar nga Këshilli Papnor i Komunikimeve Shoqërore.