Bisedimet katoliko-islame në Teheran: po lirisë fetare e rolit të saj shoqëror
(16.11.2010 RV)Myslimanët në të gjithë botën festuan sot Kurban Bajramin. Kremtime
u bënë edhe në Shqipëri e sidomos në Tiranë, me pjesëmarrjen e autoriteteve dhe të
përfaqësuesve të feve të tjera në vend. Pikërisht sot, u bë e njohur edhe komunikata
përfundimtare e takimit të 7-të ndërmjet Qendrës për Dialogun Ndërfetar të Organizatës
për Kulturën dhe Marrëdhëniet Islamike të Teheranit dhe Këshillit Papnor për Dialogun
Ndërfetar. Bisedimet u mbajtën nga data 9 deri më 11 nëntor në kryeqytetin iranian,
nën udhëheqjen e kreut për organizatën islamike, Mohamad Baqer Khorramshad dhe të
kreut të dikasterit vatikanas, kardinal Zhan-Lui Toran. Duke u bërë urimet myslimanëve,
na duket domethënëse t’ju propozojmë, pikërisht në këtë ditë feste për ta, përmbajtjen
e këtij dokumenti, me frymë të theksuar dialogu ndërmjet krishterimit e islamizmit. “Besimtarët
e bashkësitë fetare – fillon dokumenti – mbi bazën e fesë së tyre në Zotin, kanë një
rol të veçantë në shoqëri, barabar si qytetarët e tjerë”. “Feja – pohohet më poshtë
– ka një përmasë shoqërore të brendshme, që shteti duhet ta respektojë; prandaj, edhe
në interes të shoqërisë, feja nuk mund të kufizohet në sferën private”. “Besimtarët
– vazhdohet më tej – janë të thirrur të bashkëpunojnë në kërkimin e së mirës së përbashkët,
mbi bazën e marrëdhënieve të qëndrueshme ndërmjet fesë e arsyes”. Në këtë kontekst,
“është e nevojshme që të krishterët e myslimanët, ashtu si edhe të gjithë besimtarët
e njerëzit vullnetmirë, të bashkëpunojnë për t’iu përgjigjur sfidave të sotme, duke
promovuar vlerat morale, drejtësinë, paqen e duke mbrojtur familjen, ambientin e burimet
natyrore”. Në komunikatë nënvizohet se “feja, për natyrën e saj, kërkon lirinë. Prandaj,
liria fetare, si e drejtë, që bën pjesë në dinjitetin njerëzor, duhet të respektohet
gjithnjë nga individët, nga agjentët shoqërorë e nga shteti. Në zbatimin e këtij parimi
themelor, duhet marrë parasysh sfondi historiko-kulturor i çdo shoqërie, që të mos
jetë në kontradiktë me dinjitetin e njeriut”. Më tej, “edukimi i brezave të rinj
duhet të bazohet në kërkimin e së vërtetës, të vlerave shpirtërore e në promovimin
e ndërgjegjes”. “Pjesëmarrësit – thuhet në fund të komunikatës – të kënaqur nga klima
e përzemërt e takimit, duke njohur ngjashmëritë dhe duke respektuar ndryshimet e ligjshme,
nënvizuan nevojën e vazhdimit të dialogut të pastër e të frytshëm”. Aktet e Takimeve
të tilla, që kanë filluar në vitin 1994, do të publikohen në anglisht dhe në gjuhën
farsi të Iranit. Bisedimet e ardhshme do të zhvillohen në Romë pas dy vjetësh.