Papa u kërkon besimtarëve të luten për viktimat e drogës e të çdo forme të vesit.
Të droguarit dhe viktimat e çdo forme të vesit janë në qendër të ndjetit të lutjes
së Papës për muajin nëntor. Benedikti XVI shpreson që falë përkrahjes e mbështetjes
së bashkësisë së krishterë, këta njerëz të ndërrojnë rrugë e ta ndryshojnë krejtësisht
jetën. Ne intervistuam përgjegjësin aktual të Bashkësisë Gjoni XXIII, Gjovani Paolo
Ramonda, i cili ka zëvendësuar themeluesin e ndjerë, don Oreste Benzi, që e kaloi
krejt jetën në përpjekjen për të nxjerrë nga kthetrat e drogës, të rinjtë që i besoheshin.
Sot për sot, a bëhet mjaft për të parandaluar konsumin e drogës dhe për të nxjerrë
të droguarit nga ky rreth vicioz? Të dëgjojmë Gjovani Paolo Ramondën:............ Po, është
një problem i thellë, i përhapur ndër të rinjtë, është një problem ekzistencial. Dua
të theksoj, se në fund të fundit, është mungesa e nënës dhe e babait, që shkakton
krizë identiteti para dhe gjatë adoleshencës, krizë, që shpërthen pastaj në këto probleme
si droga, bulimia, anorezia e nganjëherë, fatkeqësisht, edhe vetëvrasja. Siç thoshte
don Oreste Benzi: një edukator i mirë, një baba i mirë është ai që e do gruan e vet;
një nënë e mirë është ajo që e do burrin e vet. Fëmijët e dshirojn këtë lloj familjeje
e kur nuk ndodh kështu – ashtu siç na thonë të rinjtë e droguar në bashkësitë tona
terapeutike – dikush duhet të paguajë: ose rebelohen me dhunë, ose shkatërrojnë vetveten. Dr.
Ramonda, kohët e fundit po del në pah një problem tjetër, i cili po minon madje
institucionet, së paku në Itali: problemi i një seksualiteti të skajshëm, që e kthen
në mall trupin e femrës. Kjo nuk quhet më prostitucion, por “stil jetese”. Po ç’jetë
është kjo? Përmasa e edukimit të shëndoshë, të ekuilibruar, të mençur të
seksualitetit, edhe këtu, duhet të bazohet në edukimin, që duhet të japin prindërit
fillimisht, e pastaj shkolla. Gjithashtu, është përvoja e fesë së krishterë, që na
mëson bukurinë e trupit, që nuk është diçka negative, por pozitive. Trupi është dhuratë
e Zotit, nuk është pronë e jona. Dr. Ramonda, një ves tjetër është ai i
kumarit, ndoshta, disi i nënvlerësuar. Mund të luhet jo vetëm në internet, por edhe
shteti, me llotaritë e ndryshme, e nxit… Po, kjo është dramatike. E është
tragjedi – që si në rastin e alkoolit – shteti e nxit madje përmes reklamave. Nga
njëra anë, u bën thirrje të rinjve të jenë të moralshëm e, nga ana tjetër, financon
këto aktivitete. Por edhe këtu, njeriu i sotëm jeton sipas instiktit, sipas emocioneve.
Edhe të rinjtë nuk dinë më të kontrollojnë apo të orientojnë mirë emocionet. Duke
bashkuar këtë instiktivitet me pulsionet, që jep paraja, me dëshirën për të fituar
gjithnjë e më shumë pa sakrifica e përgjegjësi, krijohen drama të vërteta. Në bashkësitë
tona, kemi edhe njerëz, nga të cilët varej familja, me këtë ves, që pak nga pak e
kanë marrë veten. Në këtë muaj të nëntorit, Papa u kërkon besimtarëve të
luten për viktimat e këtyre veseve… Po: lutja na bën të kuptojmë se nuk
je vetëm ti, që edukon, por me ty, është edhe Zoti. Pastaj, lutja na çon drejt marrjes
së përgjegjësisë, si individë e si bashkësi, sepse, siç thoshte gjithnjë don Oreste
Benzi: na edukon si bashkësi, si popull. E një popull mund të quhet kështu vetëm nëse
di si të sillet me të vegjlit, me të dobtit dhe me personat e braktisur, përndryshe
nuk është popull, por një turmë njerëzish, që mendon vetëm për vete.