Кіраўнік Ватыканскага радыё адзначае 50-годдзе законных шлюбаў
12 лістапада 2010 г. прэс-сакратар Апостальскай Сталіцы, дырэктар Ватыканскага радыё
і Ватыканскага тэлебачання кс. Фэдэрыко Ламбардзі SI адзначае 50-годдзе законных шлюбаў.
З гэтай нагоды ён удзяліў інтэрв'ю нашаму радыё.
У інтэрв’ю кс. Ламбардзі ўзгадвае,
што правёў сваё дзяцінства і маладосць у Турыне (Італія). Будучы прэс-сакратар вучыўся
ў езуіцкай школе і ўдзельнічаў у скаўцкіх рухах, якія дзейнічалі ў араторыі салезіянаў.
У той час будучага святара надзвычай цікавілі фізіка і альпінізм. Пасля заканчэння
сярэдняй школы, ва ўзросце 18 год перад маладым чалавекам паўстала праблема выбару
жыццёвага шляху. Як адзначае кс. Ламбардзі, выбар прысвячэння сябе служэнню Богу і
бліжнім быў дастаткова спантанным, а рэалізацыя гэтага служэння ў Таварыстве Езуса
— натуральным выбарам.
Распавядаючы аб сваім служэнні, якое нёс на працягу
паўстагоддзя, святар падкрэслівае, што яно было праяўленнем паслухмянасці ў адносінах
да настаяцеляў. Так праходзіла 11-гадовая праца кс. Ламбардзі ў папулярным часопісе
італьянскіх езуітаў «La Civiltà Cattolica», затым кіраванне італьянскай законнай правінцыяй,
праца на Ватыканскім радыё з 1991 г., на Ватыканскім тэлебачанні з 2001 г. і ў Прэс-службе
Апостальскай Сталіцы з 2006 г.
Адказваючы на пытанне аб найбольш важнай хвіліне
ў сваім жыцці, прэс-сакратар Апостальскай Сталіцы ўзгадвае нядаўнюю кансэкрацыю касцёла
Святой Сям’і ў Барселоне. Будучы там у мінулую нядзелю ў межах візіту Папы ў Іспанію
і ўдзельнічаючы ва ўрачыстасці пасвячэння цудоўнай базылікі, кс. Ламбардзі, як кажа,
прыгадаў вандроўку на ровары з Турына ў Барселону, у якой пабываў у 13 год з групай
скаўтаў. Прыбыўшы ў Барселону, вандроўнікі не ведалі, куды ісці далей. Убачыўшы чатыры
шпілі, вырашылі рухацца ў гэтым кірунку. Так яны апынуліся ў месцы, дзе Папа ў мінулую
нядзелю ўзначаліў малітву «Анёл Панскі». «Праз 50 год я змог пераканацца, як вырас
гэты будынак. Падумаў таксама аб сваім жыцці, аб тым, як яно разгарнулася ў служэнні
Касцёлу. Пачынаючы менавіта ад таго дня», — дадае юбіляр.