Octava Dies ксяндза Ламбардзі. Вярнуцца да Слова Божага

Рубрыка Octava Dies дырэктара Ватыканскага радыё ксяндза Ламбардзі прысвечана сёння выданню новай папскай адгартацыі. На самым пачатку сваіх разважанняў ксёндз Ламбардзі пытаецца: чаму новы дакумент, настолькі вялікі, прысвечаны менавіта Слову Божаму?

45 гадоў таму Сабор апублікаваў канстытуцыю “Dei Verbum”, якую многія лічаць адным з найбольш важных саборных дакументаў, а некаторыя, самым важным, паколькі ён паказвае сапраўдную крыніцу жыцця і місіі Касцёла ў свеце. Гэта, безумоўна, адыгрывае ключавую ролю ў саборным аднаўленні.

Карацей кажучы, - заўважае кс. Ламбардзі - Святое Пісанне – кніга веры, народжаная з веры Божага народа, і яна можа быць правільна зразумета толькі ў кантэксце гэтай веры і з гэтай веры павінна чэрпаць.

Новы папскі дакумент настолькі шырокі і грунтоўны, што многія чытачы і каментатары, верагодна, разгублены багаццем і разнастайнасцю зместу. Кс. Ламбардзі кажа пра дзве рэчаіснасці, на якія кладзе націска Папа: Чытанне і інтэрпрэтацыя Святога Пісання метадамі, прапанаванымі навукай, але ў святле веры, каб сутыкнуцца з жывым Словам Божым, Езусам Хрыстом; а таксама жыццё і практыкаванне паслання і закліку Слова ў паўсядзённым жыцці Касцёла, каб дапамагчы вернікам і ўсяму чалавецтву знайсці Бога праз Езуса Хрыста.

Для гэтага, Бэнэдыкт XVI не толькі дае нам новы дакумент для вывучэння і прыняцця: ён прапануе нам таксама дапамогу і прыклад. У сваёй кнізе пра Есуса ён дае нам усе мадэлі чытання і тлумачэння Пісання, у сваіх казаннях прапануе для ўсіх святароў мадэль прапаведвання, якое заўсёды грунтуецца на Слове Божым, гарманічнай тэалогіі, духоўнасці і актуальнасці. Мы, насамрэч, можам чакаць, - пад яго кіраўніцтвам - адраджэння вялікага руху, жаданага Саборам.