BE: heqja e vizave, Malmstrom Shqipërisë, mos na zhgënjeni.
Pesë ditë pas vendimit unanim të Bashkimit Evropian për lëvizjen pa viza të qytetarëve
të Shqipërisë në zonën Shengen, komisionerja për Çështjet e Brendshme dhe Drejtësinë
në BE, Cecilia Malmström, vizitoi sot zyrtarisht Tiranën. "Regjimi pa viza
është një mundësi për të udhëtuar, por jo për të punuar" u shpreh Komisionerja
e Bashkimit Evropian për Çështjet e Brendshme dhe Drejtësinë, Cecilia Malmstrom sot
në Tiranë. Ajo tha se "liberalizimi i vizave është një mundësi fantastike për shqiptarët,
të cilët do lëvizin të lirë pa viza në Bashkimin Evropian dhe në zonën 'Shengen',
e shpresojmë të mos zhgënjehemi". Gjatë një deklarate të përbashkët për shtyp
me Kryeministrin e Shqipërisë Sali Berisha, Malmstrom shprehu kënaqësinë që është
sot në Tiranë për të folur me autoritetet shqiptare mbi vendimin e marrë të hënën,
për t'u dhënë qytetarëve shqiptarë lirinë e lëvizjes pa viza në Bashkimin Evropian
dhe në zonën Shengen. "Kjo është sigurisht një mundësi fantastike për shqiptarët
për të pasur mundësinë të vizitojnë miqtë, familjarët dhe të kenë mundësinë të njohin
më mirë Bashkimin Evropian. Por kjo është një mundësi edhe që njerëzit e Bashkimit
Evropian t'i njohin shqiptarët më mirë. Në këtë mënyrë ne e bëjmë më të lehtë për
njerëzit e zakonshëm, komunitetin e biznesit dhe të tjerët për t'u njohur me njëri-
tjetrin", tha Malmstrom. Ajo vlerësoi angazhimin personal të Kryeministrit Berisha
në informimin e shqiptarëve që mund të udhëtojnë me pasaporta biometrike për në Bashkimin
Evropian për tre muaj, si dhe me kufizimet e këtij vendimi. "Liberalizimi i vizave
nuk u jep të drejtën qytetarëve shqiptarë për leje pune dhe për të qëndruar më gjatë
në vendet Shengen. Kryeministri është angazhuar personalisht, së bashku me anëtarë
të tjerë të qeverisë për të informuar rreth mundësive si dhe kufizimeve, në mënyrë
që të shmang abuzimin e këtyre mundësive", tha Malmstrom. I pranishëm në këtë
takim ishte edhe Sekretari i Shtetit të Mbretërisë së Belgjikës, Melchior Whatelet,
në cilësinë e përfaqësuesit të Vendit që mban presidencën e radhës së BE. Ai konfirmoi
se "27 vendet anëtare të BE kanë dhënë një sinjal të rëndësishëm duke votuar unanimisht
liberalizimin e vizave për Shqipërinë". "Ne e kemi kuptuar sa e rëndësishme ishte
kjo çështje për Shqipërinë dhe për Bashkimin Evropian dhe dua të falënderoj Kryeministrin
Berisha dhe ministrin Basha për angazhimin që kanë dhënë për të respektuar të gjitha
kushtet e lidhura me liberalizimin e vizave. Shqipëria ka marrë një angazhim të fortë
ndaj 27 vendeve anëtare për të ndaluar çdo keqpërdorim ose abuzim të liberalizimit
të vizave", tha Sekretari i Shtetit të Belgjikës. Ai shprehu bindjen se "Shqipëria
do të përmbushë angazhimet e saj në mënyrë korrekte, ashtu siç ka përmbushur angazhimet
për të arritur këtë liberalizim vizash".( nga ATSH-ja)
MALMSTRÖM
STUDENTËVE: INFORMOHUNI PËR KUFIZIMET E QËNDRIMIT "Të gjithë shqiptarët, por
veçanërisht të rinjtë, do të kenë mundësi të udhëtojë pa viza nga data 15 dhjetor,
por duhet të informohen saktë për përcaktimet që rrjedhin nga heqja e regjimit të
vizave", theksoi sot pasdite Komisionerja për Çështjet e Brendshme në Bashkimin Eruropian,
Cecilia Malmström, në një takim me studentët e Universitetit Europian të Tiranës. Duke
e konsideruar hejqjen e vizave për Shqipërinë si një vendim mjaft të rëndësishëm,
Malmström u tha studentëve se, "tashmë keni një mundësi mjaft të mirë, e cila mundëson
lëvizjen e lirë në të gjitha vendet e BE-së". Por, ajo vuri në dukje se liberalizmi
i vizave ka disa kërkesa, me të cilat nuk duhet të abuzohet. Malmström i kërkoi
studentëve dhe të rinjve shqiptarë të mirëinformohen për limitet e qëndrimit në vendet
e BE-së. Ajo theksoi se, heqja e regjimit të vizave u garanton lirinë e lëvizjes
qytetarëve të Shqipërisë si dhe ofron mundësi të pashfrytëzuara deri më tani për zhvillimin
e marrëdhënieve ndërmjet Shqiperise dhe BE-së. "Keni mundesi të vizitoni vende
të rëndësishme dhe jo të qendroni dhe të punoni, por një mundësi për të udhëtuar.
Shpresoj ta perdorni në mënyrë korrekte", tha Malmström. Edhe ministri i Brendshëm
belg, Mechier Wathelet, i pranishëm në këtë takim, vuri në dukje përgjegjësinë që
duhet të kenë qytetarët shqiptarë, pasi qëndrimi është i kufizuar, për të takuar familjarët
dhe jo për të punuar. Ai tha se, "ne ju dhamë mundësinë për t'u afruar me BE, ndërkohë
që Shqipëria duhet të na tregoje se liberalizimi është një histori e sukseshme". Komisionerja
e Bashkimit Evropian për Çështjet e Brendshme, Cecilia Malmström, vizitoi sot për
here të pare Shqipërinë, që nga dita e dhënies së vendimit të Këshillit për heqjen
e rregjimit të vizave afatshkurtra për qytetarët e shqiptarë.