Benedikti XVI: Kongreset eukaristike ndërkombëtare të mbështesin punën e ungjillëzimit
të ri.
(11.11.2010 RV)“Kongreset e reja Eukaristike, në kontekstin e tashëm, duhet
të japin kontribut për ungjillëzimin e ri”. Këtë pohoi Papa Benedikti XVI, sot paradite,
gjatë takimit me pjesëmarrësit në mbledhjen plenare të Komitetit Papnor për Kongreset
Eukaristike, të cilët i priti në audiencë në Vatikan. Gjithashtu Papa bëri thirrje
që të vlerësohen edhe shprehjet e ndryshme të devocionit popullor kushtuar kultit
të Eukaristisë:
“Një festë e fesë përreth Krishtit”, “sakrificës më të lartë
të njerëzimit”, një festë që mund të jetë kombëtare ose botërore dhe që në këtë rast
quhet “Statio Orbis” – grumbullim i botës në një pikë të vetme. Ky është, sipas Benedikti
XVI, thelbi i Kongresit Eukaristik: Të mbledhurit e mbarë Kishës, e cila “shtrëngohet
përreth Zotit të vet”. Janë këto mendime që Papa i rrahu edhe me specialistë të kësaj
teme, pikërisht, pra, me pjesëmarrësit në Asamblenë plenare të Komitetit Papnor për
Kongreset Eukaristike ndërkombëtare. E ndërsa besimtarët e shumtë, të cilët e kanë
tepër për zemër kultin e Eukaristisë, po punojnë për kongresin e ardhshëm, në program
për Dublin për në 2012, Benedikti XVI shprehu disa konsiderata mbi rëndësinë shpirtërore
të këtyre takimeve, të cilat, siç tha ai vetë, “tashmë kanë një histori të gjatë në
Kishë”:
“Nëpërmjet bashkimit me Korpin e Krishtit, Kisha bëhet gjithnjë
e më tepër ajo çka është: mister i një njësije “vertikale” dhe “horizontale” për krejt
racën njerëzore. Mikrobeve të shpërbërjes, të cilët janë shumë të rrënjosur tek njerëzimi
për shkak të mëkatit, siç na tregon përvoja e përditshme, iu kundërvihet forca që
lind bashkimin e Korpit të Krishtit. Eukaristia, që formon vazhdimisht Kishën, krijon
edhe bashkimin ndërmjet njerëzve.”
Më pas Papa Racinger kujtoi edhe disa
“rrethana fatlume” të cilat i bënë akoma më domethënëse punimet e plenaries, në veçanti
50-vjetorin e Kongresit Eukaristik në Mynih, në Bavari, ku pat marrë pjesë edhe Jozef
Racinger, – asokohe teolog i ri , shpjegoi Benedikti XVI – e që “shënoi një kthesë
në kuptimin e këtyre ngjarjeve domethënëse për Kishën duke përpunuar idenë e “statio
orbis” – pra të besimtarëve të mbledhur në një vend, ide kjo që u trajtua edhe në
tekstet e ndryshme të magjisterit të Papëve. Përveç kësaj, takimi i ardhshëm i Dublinit
do të marrë edhe karakter jubilar, sepse bie pikërisht në 50-vjetorin e hapjes së
Koncilit II të Vatikanit. Në vijim, Ati i Shenjtë vuri në dukje qëllimin kryesor të
këtyre takimeve:
“Detyrë e Kongreseve Eukaristike, mbi të gjitha në kontekstin
e tashëm, është dhënia e një kontributi të posaçëm për ungjillëzimin e ri, duke promovuar
ungjillëzimin mistagogjik, që kryhet në shkollën e Kishës në lutje, duke u nisur nga
liturgjia dhe nëpërmjet liturgjisë. Por, çdo kongres sjell me vete edhe një puhizë
ungjillëzuese në kuptimin më të ngushtë misionar, aq sa binomi eukaristi-mision ka
hyrë dhe bën pjesë në udhëzimet bazë propozuar nga Selia e Shenjtë.”
Pastaj,
Benedikti XVI iu dha specialistëve edhe një udhëzim liturgjiko-baritor. Meqë “kremtimi
eukaristik është qendra dhe kulmi i të gjitha manifestimeve të fesë dhe formave të
ndryshme të mëshirës, vuri në dukje Papa, atëherë:
“...është e rëndësishme
që çdo Kongres Eukaristik të dijë të përfshijë dhe të integrojë, sipas shpirtit të
reformës konciliare, të gjitha shprehjet e kultit eukaristik “extra missam” – jashtë
Meshe, të cilat e kanë burimin tek devocioni popullor, ashtu sikundër edhe shoqatat
e besimtarëve frymëzohen nga Eukaristia në mënyra të ndryshme (...) Edhe në këtë kuptim,
Kongreset Eukaristike janë një ndihmë për përtëritjen e vazhdueshme në jetën eukaristike
të Kishës.”