Епіскап, які пакідае Англіканскую Царкву, параўнаў яе з сеццю кафейняў, што губляе
сваіх кліентаў
Епіскап Эндру Бэрнхэм,
адзін з пяці англіканскіх іерархаў, якія аб’явілі аб сваім пераходзе ў каталіцызм,
параўнаў сучасную Англіканскую Царкву з кафейнай сеццю, якая губляе кліентаў з-за
неадпаведнасці прапануемых страваў назве арганізацыі.
«Калі б кафейная сець
„Коста кофе“ кожны раз прапаноўвала розныя меню, а вы б нават не ведалі, што гэта
за прадукт, яна б закрылася… У Царкве Англіі мы зараз маем столькі розных „прадуктаў“,
што проста не ведаеш, што атрымліваеш», — цытуе епіскапа Бэрнхэма брытанская газета
«Дэйлі тэлеграф».
Па словах епіскапа, як паведамляе інфармацыйнае агенцтва
«Интерфакс», сёння веруючыя людзі, заходзячы ў тую ці іншую англіканскую святыню,
ужо не ведаюць, што іх там чакае: адны прыходы праводзяць традыцыйныя набажэнствы,
іншыя прызначаюць жанчын-святароў.
«Царква Англіі вырашыла, нібыта можа мець
уласнае меркаванне аб тым, што ёй можна рабіць. А гэта знак таго, што Царква забываецца,
адкуль яна з’явілася», — дадаў іерарх.
У сваю чаргу епіскап Кіт Ньютан, які
таксама пераходзіць у каталіцызм, заявіў, што яго рознагалоссі з Англіканскай Царквой
больш сур’ёзныя, чым пытанне аб святарстве сярод жанчын. У апошні час, як адзначыў,
у Англіканскай Царкве адзначыўся ліберальны падыход да такіх маральных пытанняў, як
благаслаўленне аднаполых пар і аборты. Па словах епіскапа Ньютана, сёння «не ведаеш
напэўна, за што ж выступае Царква Англіі».
На днях пяць англіканскіх епіскапаў
аб’явілі аб сваім пераходзе ў каталіцызм з прычыны непрыняцця ліберальных рэформ,
якія праводзіць Англіканская Царква.
У сувязі з гэтым Каталіцкі Касцёл Англіі
і Уэльса аб’явіў, што вітае рашэнне біскупаў, у той час як глава Англіканскага саюза
архіепіскап Кентэрберыйскі Роўэн Уільямс выказаў свой жаль у сувязі з распачаццем
расколу ў Англіканскай Царкве.