Salla vatikanase e Shtypit konfirmon: Papa iu përgjigj letrës së Presidentit iranian.
(10.11.2010 RV)Kardinali Zhan Lui Toran, kryetar i Këshillit Papnor për dialogun
ndërfetar, gjatë një takimi me presidentin iranian, Mahmud Ahmadinexhad, në Teheran,
i dorëzoi një mesazh të Papës Benedikti XVI. Kujtojmë se një delegacion i lartë i
Vatikanit ndodhet në vendin aziatik, ku merr pjesë në ciklin e takimeve teologjike
e kulturore, në kuadrin e marrëdhënieve dypalëshe Iran- Seli e Shenjtë. Ky është
takimi i shtatë, me temë “Perspektivat e bashkëpunimit të të krishterëve me myslimanët”.
Salla
e Shtypit e Vatikanit, duke konfirmuar lajmin, shpjegon se mesazhi është përgjigjja
që i jep Papa një letre, dërguar nga Presidenti iranian, në fillim të tetorit të kaluar. Në
dokument, Ahmadinexhad i kërkonte Papës një impenjim të përbashkët për mbrojtjen e
lirisë fetare. Lajmi konfirmohet edhe nga Agjensia zyrtare e shtypit e Republikës
Islamike të Iranit. Agjensia pohon se Ahmadinexhadi e vlerësoi shumë mesazhin
e Papës dhe theksoi: “Ka ardhur çasti që besimtarët e të gjitha feve të rebelohen
kundra materializmit, që vijon të sundojë botën e ta mundin të keqen, për ta zëvendësuar
me mesazhin e fitores së plotë të së mirës mbi tokë”. Sipas agjensisë IRNA (Agjensia
e Re Islamike) në çastin e dorëzimit të mesazhit të Papës, kardinali Toran pohoi se
të krishterët e myslimanët duhet të jenë model për të gjitha popullsitë e botës.