Komisioni Evropian i kërkon Shqipërisë reforma të mëtejshme për anëtarësim
Komisioni Europian miratoi dje paketën për vitin 2010 për Zgjerimin, i cili përmban
Opinionet për aplikimet për anëtarësim të Malit të Zi dhe Shqipërisë si dhe shtatë
Raporte të Progresit mbi vendet e tjera kandidate dhe potencialisht kandidate. Zyra
e shtypit e KE-së bëri të ditur se për Shqipërinë, Komisioni arriti në përfundimin
se ndërsa është bërë progres i mirë gjatë 12 muajve të fundit, reforma të mëtejshme
nevojiten në një sërë fushash kyçe, siç përcaktohen edhe në Opinion, para se vendi
të jetë i gatshëm të fillojë negociatat për anëtarësim. Duke u ndalur në kriteret
politike, Komisioni vlerëson se Shqipëria ka bërë progres në përmbushjen e kritereve
politike të Kopenhagenit. Në lidhje me funksionimin e institucioneve demokratike
dhe shërbimin civil, KE thekson se "Shqipëria ka ndërtuar një kuadër kushtetues dhe
legjislativ në përputhje me standardet evropiane". Zgjedhjet e vitit 2009 përmbushën
shumicën e standardeve ndërkombëtare dhe ishin më të mira se zgjedhjet e viteve të
tjera, megjithë evidentimin e disa mangësive. Gjatë viteve të fundit, Shqipëria
ka forcuar shtetin e së drejtës, duke kryer në veçanti reforma legjislative dhe institucionale
në gjyqësor dhe në luftën kundër korrupsionit, ndërsa agjencitë e zbatimit të ligjit
janë fuqizuar. Kuadri ligjor dhe institucional i vendit për të drejtat e njeriut
është ndërtuar në pjesën më të madhe dhe u korrespondon gjerësisht standardeve evropiane.
Por KE shprehet në Opinionin e tij se "do të duhen përpjekje të mëtejshme për
të trajtuar mangësitë në fushën politike". Efektshmëria dhe stabiliteti i institucioneve
demokratike shqiptare, në veçanti Kuvendit, nuk është arritur mjaftueshëm. Dialogu
politik është konfliktual dhe nuk i përmbahet frymës demokratike, kjo jo vetëm për
arsye të ngërçit politik që prej zgjedhjeve të vitit 2009. Mangësitë e identifikuara
gjatë zgjedhjeve të fundit nuk janë përkthyer ende në reformë zgjedhore, e cila nevojitet
për zgjedhjet e ardhshme. "Administrata publike vazhdon të jetë e dobët dhe e
politizuar, ndërsa një strategji gjithëpërfshirëse dhe e bashkërenduar për reformë
në gjyqësor është ende e pamiratuar", thuhet në paketën për vendin tonë, duke shtuar
se "zbatimi i shtetit të së drejtës mbetet jo i plotë". KE thekson se "duhet arritur
një ecuri e qëndrueshme e luftës efikase kundër korrupsionit dhe krimit të organizuar.
Zbatimi i legjislacionit dhe instrumentet e politikave në fushën e të drejtave të
njeriut dhe mbrojtjes së minoriteteve është ende i pamjaftueshëm". Më tej Komisioni
vlerësoi se Shqipëria luan një rol konstruktiv në ruajtjen e stabilitetit dhe të marrëdhënieve
të mira fqinjësore me shtetet e tjera të Ballkanit Perëndimor dhe vendeve të BE-së. Për
sa i përket kritereve ekonomike, Komisioni deklaron se "Shqipëria ka bërë hapa të
rëndësishëm drejt vendosjes së një ekonomie tregu funksionale. Por për të patur një
ekonomi tregu funksionale, vendit i nevojitet të forcojë më tej qeverisjen, të përmirësojë
performancën e tregut të punës, të eliminojë pasiguritë në fushën e të drejtës së
pronës dhe të fuqizojë zbatimin e ligjit". Me qëllim që në periudhën afatmesme
të mund t'i bëjë ballë presionit konkurrues dhe forcave të tregut brenda BE-së, Shqipërisë
i duhet të fuqizojë infrastrukturën fizike dhe kapitalin njerëzor, si edhe të vazhdojë
reforma të mëtejshme strukturore. Në fushën e zbatimit të reformave ekonomike
ekziston tashmë një ecuri e mirë, si edhe ka konsensus të gjërë rreth çështjeve thelbësore
të politikave ekonomike. "Shqipëria ka arritur një nivel stabilititeti makroekonomik
të mjaftueshëm për t'u mundësuar operatorëve ekonomikë të marrin vendime në një mjedis
parashikueshmërie", theksohet në konkluzionet e Komisionit. Pavarësisht krizës,
politikat e duhura mikse makroekonomike gjatë viteve të fundit kanë gjeneruar nivele
rritjeje në ekonomi që tejkalojnë shifrën 5%. Në lidhje me legjislacionin e BE-së,
Komisioni bën të ditur se "Shqipëria ka bërë përpjekje domethënëse për ta përafruar
legjislacionin e saj me atë të BE-së,veçanërisht për standardizimin, konkurrencën
dhe prokurimin". Gjithashtu vlerësohet se "kuadri rregullator për biznesin është
përmirësuar, duke arritur përafrim të mëtejshëm në fushat e doganave dhe tatimeve
si dhe janë bërë përpjekje të konsiderueshme për të forcuar luftën kundër krimit të
organizuar (lidhur me kuadrin legjislativ, kapacitetet hetuese, burimet)". Në përfundim
të Opinionit për Shqipërinë, KE shprehet se vendi duhet të ecë përpara në fusha të
tjera si mjedisi, pronësia intelektuale, transporti, bujqësia, siguria e ushqimit,
politika sociale dhe ajo audio-vizuale si dhe duhet të tregojë rezultate konkrete
në luftën kundër drogës, trafikimit të qenieve njerëzore dhe pastrimit të parave.