Shqipëri: Aksident i rëndë autobusi në rrugën Ballsh-Tepelenë.
Në Shqipëri në një aksident të rëndë të linjës së autobusëve Tiranë Athinë të paktën
9 persona humbën jetën dhe rreth 41 të tjerë u plagosën, disa prej të cilëve ende
në gjendje të rëndë. Shkak i aksidentit të rëndë të ndodhur mbrëmë në rrugën nacionale
Fier-Tepelenë në fshatin Ziaj të komunës Fratar, kur autobusi i linjës Tiranë -Athinë,
me targë INB 9900 ra në një distancë rreth 100 m, ku për pasojë, humbën jetën 9 persona
dhe mbetën të plagosur 40 të tjerë, ishte humbja e kontrollit nga drejtuesi i mjetit,
bëri të ditur sot Policia e Shtetit. Në një deklaratë për shtyp, Policia e Shtetit
sqaroi përmes zëdhënëses Klejda Plangarica se "nga hetimet paraprake të grupit hetimor
në vendngjarje, shkak rezultoi se ka qenë humbja e kontrollit gjatë drejtimit të mjetit
nga ana e drejtuesit të tij, shtetasit Tomas Tsogas. Nga kryerja e ekspertimit
auto-teknik të mjetit u vu re se sistemi i drejtimit të mjetit ka qenë në gjendje
të rregullt teknike dhe funksionale, shpejtësia me të cilën lëvizte autobusi ishte
brenda normave të lejuara dhe segmenti ku ka ndodhur aksidenti ka qenë i vijëzuar
dhe me gjerësi rruge 6.4 m. Burimet bëjnë të ditur gjithashtu se, nga kontrolli
mjeko-ligjor dhe testi elektronik i përdorimit të alkoolit ka rezultuar se drejtuesi
i mjetit nuk ka përdorur pije alkoolike, ndërsa ka një eksperiencë pune prej 15 vjetësh
në këtë kompani udhëtimi. Viktimat e aksidentit tragjik janë Fredi Guma, 45 vjeç,
nga Frakull i Vogël, Lushnje, Manushaqe Bali, 33 vjeçe nga Lushnja, Refotaq Bashllari
nga Tirana, Dhurata Halilaj, 45 vjeç nga Laçi, Marjola Guma, 13 vjeç nga Fieri, Nikollë
Nina, 75 vjeç nga Durrësi, Dallëndyshe Shuli nga Lushnja Afërdita Basha 40 vjeç nga
Laçi. Ndërsa Eduard Prenci 29-vjeç nga Lushnja dhe Petro Vangjeli 61-vjeç nga Saranda
janë të plagosur rëndë dhe janë dërguar për të marrë ndihmë më të specializuar mjekësore
në spitalin e Janinës. Gjithashtu në spitalin Ushtarak në Tiranë gjenden dy nga
të plagosurit e aksidentit Sebie Boksiu, 30 vjeç dhe Luan Çela, 22 vjeç, ndërsa në
spitalet e Gjirokastrës dhe Fierit gjenden të plagosurit e tjerë të aksidentit, të
gjithë jashtë rrezikut për jetën. Në operacionin e shpëtimit të pasagjerëve të
dëmtuar nga ky aksident, mbrëmë strukturat e Policisë së Shtetit u angazhuan së bashku
me ato të Drejtorive të Policisë së Qarqeve Gjirokastër dhe Fier, Komisariateve të
Policisë Fier, Tepelenë dhe Ballsh, rreth 100 forca të FNSH dhe forca të Repartit
Special RENEA. Në Drejtorinë e Përgjithshme të Policisë u ngrit një grup pune,
i cili koordinoi gjithë veprimet e shërbimeve të policisë në vendngjarje, ku për menaxhimin
dhe drejtimin e operacionit të shpëtimit ishin zv/ministri i Brendshëm, Avenir Peka
dhe drejtues të lartë të Policisë së Shtetit
Një prej të plagosurve në këtë
aksident, V.Sulkaj tregon për ATSH-në atë çka ndodhi dhe përjetoi mbrëmë. "Mbaj
mënd se gjatë gjithë rrugës, shoferi nuk ecte mirë. Pati disa raste të manovrimeve
të gabuara më parë se të ndodhte kjo tragjedi. Njëherë desh doli prapë nga rruga dhe
pati një devijim në frenim pa vajtur në Ballësh dhe një herë tjetër, sapo kaluam Ballshin.
Në rastin e aksidentit shoferi pati një devijim të fortë dhe nga frenimi, autobusi
bëri rrotullim dhe u përmbys. Gjatë kohës kur ndodhi aksidenti nuk binte shi, nuk
kishte mjegull, por rruga ishte e lagur. Di që shoferi fliste shpesh në telefon, ndërsa
në çastin kur ndodhi aksidenti nuk e di". Një tjetër i aksidentuar, A.Goga tregon
historinë e aksidentit. "Jam emigrant në Greqi që prej 10 vjetësh. Pas disa ditë
pushimesh në Shqipëri ditën e djeshme u nisa për t'u kthyer në Greqi me autobusin
e linjës Tiranë -Athinë. Gjatë rrugës, të gjithë e pamë se shoferi nuk e drejtonte
mirë autobusin, pasi bënte frenime të rënda dhe nuk ishte i sigurt në timon. Patëm
tre raste të tilla pa arritur te momenti fatal, për të cilin nuk di ç'të them, se
isha në gjumë. Jam zgjuar i llahtarisur nën tmerrin e rënkimeve, thirrjeve, të qarave,
në një greminë rreth 100 m. thellësi". Një tjetër i aksidentuar shprehet se "aksidenti
mund të eliminohej. Shoferi duhej të ishte më i vëmendshëm, se terreni ishte rrëshqitës,
rruga e keqe dhe e ngushtë, me kthesa. Ai fliste në telefon dhe nuk i vlerësoi vështirësitë
e udhëtimit", thotë ai. Përballë kësaj fatkeqësie të madhe, shumë qytetarët fierakë
madje edhe lushnjarë e vlonjatë janë bashkuar me dhimbjen e të dëmtarëve dhe familjarëve
të tyre duke dhuruar gjak pranë bankës së dhurimit të gjakut. "Ka shumë sensibilizim
nga qytetarët. U mblodhën shumë dhurues, por vetëm 6 prej tyre dhuruan gjak për arsye
të disa procedurave që kemi si bankë gjaku, se shumica nuk i plotësonin kushtet. Megjithatë,
gatishmëria e tyre mbeti tek dëshira e mirë, që ka vlera të mëdha në të tilla raste",
thotë përgjegjësi i bankës së gjakut në Fier, Dashamir Banaj. Ai vlerëson edhe
gatishmërinë e qytetarëve të Lushnjes dhe Vlorës që kanë dhuruar gjak pranë bankave
në qytetet e tyre për ta sjellë në spitalin e Fierit ku ndodhen të plagosurit e aksidentit
tragjik të Fratarit. "Ofruan ndihmën e tyre për këtë rast të vështirë, ofruan
disa lloj mundësish që të përballonim situatën duke dhënë rezervat e tyre nëse ne
do të kishim nevojë. Falë humanizmit dhe një pune të programuar, spitali i Fierit
e ka situatën nën kontroll të plotë për rezervat e gjakut", shton Banaj. Drejtore
e spitalit në Fier, Donika Alujshani pohon se dhurimi vullnetar i gjakut nisi nga
personeli mjeko-infermier. Ajo tregon se pak ditë më parë bluzat e bardha filluan
fushatën sensibilizuese për dhurimin e gjakut, ndaj tragjedia rrugore e Fratarit nuk
i gjeti ta papërgatitur. "Gjithsesi, bëmë thirrje sensibilizuese dje sepse nuk
dinim përmasat e tragjedisë, numrin e të plagosurve, nevojën për gjak, etj", thotë
Alujshani, që shton se nuk pati raste të transfuzionit të gjaku tek të plagosurit.
Por gjithsesi, ajo vlerëson gatishmërinë dhe humanizmin e treguar nga qytetarë
të shumtë për të dhuruar gjak për këtë rast të rëndë edhe pse spitali i Fierit ka
rezerva të mjaftueshme gjaku.