Бэнэдыкт XVI у Іспаніі: Новыя тэхналагічныя распрацоўкі не павінны прыносіць шкоду
павазе да чалавечага жыцця
У другой палове дня
7 лістапада Святы Айцец наведаў цэнтр “Дзіцяці Езус”, у якім знаходзяцца дзеці з сіндромам
Даўна, а таксама іншымі псіхічнымі захворваннямі з найбольш патрабуючых сем'яў. Супрацоўнікі
шпіталя апякуюцца 250 пацыентамі, якім ад 3 да 21 года. Тут таксама знаходзіцца школа,
якая падрыхтоўвае дзецей да інтэграцыі ў дарослае жыццё.
Папа падзякаваў усім,
хто ўдзельнічае ў высакароднай справе дапамогі хворым.
“У той час, - сказаў
ён - калі шматлікія сем'і сутыкаюцца з сур'ёзнымі эканамічнымі цяжкасцямі, паслядоўнікі
Хрыста павінны памнажаць жэсты канкрэтнай эфектыўнай і пастаяннай салідарнасці, паказваючы
такім чынам, што дабрачыннасць з'яўляецца адметнасцю нашага хрысціянскага жыцця.
Касцёл
жадае ажыццяўляць словы Пана з Евангелля: “Я кажу вам, што зрабілі аднаму з меншых
братоў Маіх, Мне зрабілі” (Мц. 25, 40). На гэтай зямлі, гэтыя словы Хрыста заахвоцілі
многіх сыноў і дачок Касцёла, каб прысвяціць сваё жыццё дапамозе і апецы над хворымі
і інвалідамі.”
Святы Айцец звярнуўся таксама да тэмы новых медыцынскіх распрацовак
і іх уплыву на жыццё чалавека. “У апошнія дзесяцігоддзі, выдатныя дасягненні ў галіне
медыцыны ўнеслі вялікі ўклад у апеку над найбольш патрабуючымі. Неабходна, каб новыя
тэхналагічныя распрацоўкі ў галіне медыцыны ніколі не прыносілі шкоду павазе да чалавечага
жыцця і годнасці, каб тыя, хто пакутуе ад захворвання або нядугу фізічнага ці псіхічнага
заўсёды маглі атрымаць патрэбную любоў і павагу, каб адчуваць сваю каштоўнасць як
асобы у сваіх канкрэтных патрэбах.”
На прыканцы Папа звярнуўся да пацыентаў
цэнтра: “Дарагія дзеці і моладзь, я дзяку Богу за ваша жыццё, дорагое ў Яго вачах,
і запэўніваю вас у тым, што вы займаеце асаблівае месца ў сэрцы Папы. Я малюся за
вас кожны дзень і прашу вас дапамагчы мне вашымі малітвамі добрасумленна выконваць
місію, ускладзеную на мяне Хрыстом.”
Пасля наведвання цэнтра “Дзіцяці Езус”
картэж са Святым Айцом скіраваўся ў бок аэрапорта Барселоны. Там адбылася кароткая
прыватная сустрэчы Пантыфіка з прэм’ер-міністрам Іспаніі Хасэ Луісам Сапатэро. Пасля
развітальнай цырымоніі каля 19.15 мясцовага часу самалёт з Папам накіраваўся ў Рым.