Santiago i Kompostelës e Barcelona presin Benediktin XVI. Imzot Barrio: vizitë për
ta zgjuar Evropën.
(05.11.2010 RV)Ndjehet fort atmosfera e pritjes dhe e gëzimit të jashtëzakonshëm
nëpër rrugët e Santiagos së Kompostelës, ku Papa do të arrijë nesër paradite për një
vizitë dyditore. Ati i Shenjtë do të niset në orën 8. 30 nga Roma, për të arritur
në kryeqendrën e Galicisë rreth orës 11.30. Këtu do të kremtojë, pasdite, Meshën me
rastin e Vitit Jubilar kompostelan, në Plaza de l’Obradoiro. Në mbrëmje do të niset
për në Barcelonë ku, të dielën paradite, do të kryesojë Meshën e kushtimit të Kishës
e të elterit të Sagrada Familia, ndërsa pasdite do të vizitojë institutin L’Obra
Benefico Social të Nen Deu, për fëmijë me aftësi të kufizuara fizike.
Pavarësisht
nga më se 880 kilometrat, që i ndajnë, e nga ndryshimet e ndjeshme të kulturës e të
traditës, Santiagon e Kompostelës e Barcelonën në këto orë i lidh një tharm i përbashkët:
ai i pritjes së Papës. Era e vjeshtës valëvit flamujtë e Vatikanit e flamujtë katalanë,
që stolisin rrugën Rambla, e cila çon në Plaza Catalunya. Të jashtëzakonshme, masat
e sigurimit e të shumta kioskat me suvenire për vizitën e Atit të Shenjtë. Por nuk
janë kryesore këto shenja të jashtme. Ndërmjet njerëzve ndjehet fort dëshira për t’u
takuar me Pasardhësin e Shën Pjetrit i cili edhe një herë, siç u kujton guaska e detit,
që spikat në flamurin papnor, bëhet shtegtar për ta përfocuar Kishën në fe e për të
theksuar përsëri sa i rëndësishëm është krishterimi për Kontinentin e Vjetër. Banorët
e Barcelonës entuziazmohen e krenohen me faktin se Papa të dielën e ardhshme do të
flasë jo vetëm në dialektin kastelan, por edhe në atë katalan. E konfirmojnë këtë
dy nga 1.800 vullnetarët:
Përgjigje: - Thonë se do të flasë
në gjuhën katalane: e ky është çasti që e pres më shumë, sepse për ne katalanët është
gjë tejet e rëndësishme që Papa të na flasë në gjuhën tonë, në atë, që ne e konsiderojmë
si gjuha jonë.
Përgjigje: - Marrim pjesë me kënaqësi të
madhe në këtë ngjarje... e dimë se është eveniment i pashembullt. Në se mund të japim
një farë ndihme, këtë e bëjmë vërtet me kënaqësi.
Përmasa e veçantë rajonale,
gërshetohet në këto ditë të vizitës, me atë globale, mbikombëtare: Santiago i Kompostelës
është prej shekujsh fanar shpirtëror për Kontinentin e Vjetër: vetëm në vitin 2010
është vizituar nga 258 mijë shtegtarë. Qyteti i Galicisë, që ruan varrin e Shën Jakobit
të Madh, birit të Xebedeut, e Rruga e Kompostelës, në vitin 1985 u shpallën “Pasuri
e njerëzimit”. E njëjta gjë mund të thuhet edhe për Barcelonën: tempulli i Sagrada
Familia-s, guri i parë i të cilit u vendos në vitin 1882 nga arkitekti i madh katalan
Antoni Gaudí, konsiderohet njëzëri si kryevepër e historisë së artit botëror. Kisha,
e cila të dielën e ardhshme do të shpallet Bazilikë, Bibël vigane në gur, ndonëse
ende e pakryer, vizitohet çdo vit nga më se 2 milionë e gjysëm shtegtarë, mesatarisht
nga shtatë mijë e pesëqind vetë në ditë. E madhe edhe pritja e mjeteve të komunikimit
që, ndonëse po i kushtojnë vëmendje manifestimeve të rralla të protestës për vizitën
e Benediktit XVI, e paraqesin Papën si ‘të dashuruar me Spanjën”, duke nënvizuar edhe
lartësinë e tij shpirtërore e intelektuale. Në Santiago të Kompostelës, etapë e parë
e shtegtimit të Benediktit XVI, priten 200 mijë shtegtarë: dje, në rrugën që mban
emrin e Gjon Palit II, u vendos shtatorja prej bronzi e Benediktit XVI, realizuar
nga skulptori Kandido Pazos. E në se kushtet meteorologjike i shqetësojnë organizatorët,
kryetari i Bashkisë së Galicisë, Alberto Nuñez Feijo, nuk ka kurrfarë dyshimi: “Me
shi a pa shi, Papa për ne do të jetë bekim. Kush e kritikon këtë vizitë, gabohet,
vijon kryebashkijaku, Papa është pjesë përbërëse e historisë sonë”. Në mikrofonin
e të dërguarit tonë në Spanjë, Paolo Ondarza, kryeipeshkvi i Santiagos së Kompostelës,
imzot Julian Barrio Barrio, flet për emocionet me të cilat dioqeza e tij por
e pret Benediktin XVI:
Përgjigje: - Kur e morëm vesh se Papa
do të vinte në Santiago, që nga çasti i parë, e shoqëruam sidomos me lutje e mirënjohje,
për mirësinë e kujdesin e tij baritor. Pavarësisht nga impenjimet e tij të shumta,
e gjeti një ditë për të ardhur në Santiago e për këtë i shprehim mirënjohjen tonë
të thellë. Kemi përgatitur katekizëm për fëmijët, për të rinjtë e për të rriturit,
duke u kërkuar t’u pëgjigjen këtyre pyetjeve: “Kush është ai që vjen? Pse po vjen?
Si duhet ta presim? U kam kërkuar të gjithë besimtarëve të dioqezës sime të luten
që ky shtegtim të japë fryte të begata baritore e shpirtërore dhe e kam shpallur
5 nëntorin, ditë agjërimi për këtë ndjet, duke kërkuar edhe që kursimet e këtij agjërimi
të përdoren për të ndihmuar nevojtarët dhe Karitasin.
Pyetje: -
Pra, mund të themi se të gjithë, nga pak, kanë ndërmarrë nisma, duke nisur nga fëmijët,
tek të rriturit...
Përgjigje: - Është një gëzim i madh, një
shpresë e madhe për ne e për mbarë kryedioqezën. Kjo është ngjarje e madhe, prandaj
të gjithë besimtarët po përpiqen që ta presin sa më mirë Atin e Shenjtë.
Pyetje:
- Papa Benedikti XVI vjen për herë të dytë në Spanjë. Ç’do të thotë kjo për spanjollët?
Përgjigje:
- Për ne është shtytje për t’i shprehur edhe më shumë mirënjohjen; Papa
do të na ndihmojë të jemi besnikë ndaj identitetit tonë të krishterë. Benedikti XVI
e njeh mirë situatën tonë e do të na tregojë ç’duhet bërë, për të qenë ata dëshmitarë,
për të cilët ka aq shumë nevojë shoqëria jonë.
Pyetje: - Shkëlqesi,
Viti Shenjt Kompostelan ka tërhequr deri më sot 8 milionë e 236 mijë shtegtarë. A
mund të themi se kjo turmë vigane shtegtarësh bashkohet sot shpirtërisht rreth Papës?
Përgjigje:
- Pa tjetër. Ma kanë thënë edhe vetë shtegtarët. Të shumtë ata, që më
kanë siguruar se erdhën sivjet edhe pse e dinin që këtu do të shtegtonte Papa. Më
kanë thënë edhe: “Ju lutemi t’i thoni Atit të Shenjtë se më 6 nëntor do të jemi shpirtërisht
me Shenjtërinë e Tij.
Pyetje: - Shtegtimi në Santiago të Kompostelës
është vizitë si në Galici, ashtu edhe, më në përgjithësi, në Spanjë, por ne mund ta
zgjërojmë më tej horizontin e ta shikojmë si vizitë që i bëhet mbarë Evropës...
Përgjigje:
- Po, mendoj se po. Ati i Shenjtë e njeh shumë mirë realitetin evropian,
jo vetëm atë historik, por edhe këtë aktual; njeh mirë edhe rolin që, pa asnjë dyshim,
ka pasur Santiago i Kompostelës në qytetërimin evropian. Duke kujtuar fjalët aq të
bukura të Gjon Palit II, mendoj se do t’i drejtojë Kontinentit të Vjetër ftesën të
rizgjohet...
Pyetje: - Pra është një ditë e vetme, por e ngarkuar
me ngjarje e me shtegtarë, që tashmë janë gati për t’u takuar me Papën, pranë varrit
të Shën Jakut...
Përgjigje: - Po, shpresojmë të jetë kështu.
E shpresojmë edhe që koha të jetë e mirë, sepse në këtë stinë, në Santiago bie vazhdimisht
shi . Shpresoj, pra, se këtë vit nuk do të ketë reshje. E, mbi të gjitha, shpresoj
që kjo ngjarje e madhe të jetë për të gjithë, rast i përshtatshëm për ta gjallëruar
fenë e për ta jetuar këtë ditë, që na kujton se jemi të pranishëm e i përkasinm Kishës,
në bashkim me Atin e Shenjtë. Dëshiroj, në përfundim, t’i ftoj të gjithë
ata, që do të jenë të pranishëm fizikisht në Santiago, të na shoqërojnë me lutje,
që frytet baritore e shpirtërore të këtij shtegtimi të Atit të Shenjtë, të jenë ata
që shpresojmë.