(05.11.2010 RV)Pas zgjedhjeve të gjysmës së mandatit në SHBA-të, me të cilat
republikanët fituan shumicën në Dhomën e Deputetëve, por jo në Senat, presidenti amerikan
Barak Obama u nis sot për një udhëtim 10 ditor në Azi. India, Indonezia, Koreja e
Jugut dhe Japonia, ndër etapat e udhëtimit. Që nesër, Obama do të jetë në Mumbai të
Indisë, në hotelin Taxh Mahal, teatër i atentateve të përgjakshme të dy vjetëve më
parë, të cilat shkaktuan 160 viktima. Kreu i Shtëpisë së Bardhë do të marrë pjesë
në G20 e Seulit dhe në mbledhjen Azi-Paqësor të Jokohamës. Por, në qendër të misionit
të presidentit amerikan, që nuk parashikon ndonjë etapë në Kinë, janë pikërisht marrëdhëniet
me Pekinin. Të dëgjojmë opinionin e pedagogut të historisë së Azisë në Universitetin
e Torinos, Mikelguljelmo Torri: Kina po luan një rol gjithnjë e më të rëndësishëm
jo vetëm në ekonominë aziatike, por edhe në – të themi – “mbajtjen mbi ujë” të ekonomisë
amerikane. Kina është kreditori më i madh i Thesarit amerikan në Azi, duke kapërcyer
edhe Japoninë. Kështu, është krijuar një simbiozë ndërmjet SHBA-ve dhe Kinës, që e
bën këtë të fundit një kreditor gjithnjë e më të rëndësishëm për amerikanët, të cilët
transferojnë industritë në Kinë. Ka edhe një çështje tjetër: zëvendësimi i mundshëm
i dollarit – si monedhë shkëmbimi ndërkombëtar – me një monedhë të re, e cila në të
vërtetë, nuk do të qarkullojë, por do të bazohet mbi një grup monedhash të ekonomive
më të rëndësishme, duke përfshirë edhe Kinën.