Papa ipeshkvijve brazilianë: thirrjet janë në rënie, por jeta e përkushtuar nuk mund
të vdesë, sepse e deshi vetë Krishti.
(05.11.2010 RV)Jeta kushtuar Zotit nuk mund të vdesë në Kishë, sepse ishte
vetë Krishti që e zgjodhi për vete këtë mënyrë të jetuari. Jezusi, sa ishte në botë,
jetoi i varfër, i pastër, i dëgjueshëm. E pohoi Benedikti XVI në audiencën e paradites
së sotme me një grup ipeshkvijsh brazilianë të rajonit Jug II, të cilët i priti në
vizitë ad Limina. Papa është plotësisht i sigurt se rënia e numrit të thirrjeve
e plakja e instituteve, nuk janë shenja, që flasin për perëndimin e jetës rregulltare.
Nuk tregojnë se heret a vonë kjo mënyrë jetese do të marrë fund në Kishë. Jo! Ajo
nuk mund të zhduket kurrë, sepse e ka zanafillën në vetë Zotin, që e zgjodhi për vete
këtë mënyrë jetese: “A vida consagrada nunca poderá… Jeta e
përkushtuar nuk mund të vdesë e as të mungojë kurrë në Kishë: e deshi vetë Jezusi,
si pjesë të pazëvendësueshme të Kishës së Tij. Prej këndej, ftesa për të vënë në qendër
të vëmendjes impenjimin baritor të thirrjeve për jetë të përkushtuar: në se jeta e
rregulltare është në dobi të mbarë Kishës, ka të bëjë me të gjithë, atëhere puna baritore
kushtuar thirrjeve për jetë të përkushtuar duhet të jetë impenjim i dorës së parë,
nevojë që e ndjejnë të gjithë ipeshkvijtë, meshtarët, rregulltarët, shekullarët”. Ekzistenca
e instituteve rregulltare, pra, nuk është në rrezik, por kjo nuk e përjashton reflektimin
e thellë mbi mënyrën e propozimit të saj. Të gjithë duhet të përpiqen ditë për ditë
të gjejnë format më të përshtatshme për të ndjekur Krishtin në rrugën e këshillave
ungjillore.
Benedikti XVI sqaroi edhe lidhjen delikate ndërmjet nevojave baritore
të Kishës vendase e veçorive karizmatike të bashkësive rregulltare. E, duke cituar
një fragment, shkëputur nga Dokumenti i 1994-ës me titull “Jeta vëllazërore në bashkësi”,
pohoi: “Como a comunidade religiosa não… Ashtu si bashkësia
rregulltare nuk mund të veprojë në mënyrë të pavarur, ndryshe ose, edhe më keq akoma,
kundër direktivave e baritorisë së Kishës së veçantë, kështu edhe Kisha e veçantë
nuk mund t’i përdorë sipas qejfit a nevojave të veta, bashkësinë rregulltare ose
anëtarët e saj”. Si e sqaroi drejtpeshimin ndërmjet Kishës lokale e institutit
rregulltar dhe ripohoi se çdo bashkësi e përbërë nga njerëz të përkushtuar, që ndjekin
tradita të lashta apo të reja, e pasuron Kishën, si gjymtyrë e gjallë e saj, Papa
u ndal tek një nga problemet më të rëndësishme: ai i risimit të brendshën, që duhet
ta kenë në qendër të vëmendjes të gjitha Kongregatat. Përtëritja, pohoi, varet kryesisht
nga formimi i anëtarëve: “A capacidade formativa de um Istituto… Aftësia
formuese e një Instituti, si në fazën fillestare ashtu edhe më pas, është themelore
për gjithë procesin e përtëritjes. Në se jeta e përkushtuar është përvetësim i ndjenjave
të Krishtit, një rrugë e tillë, sigurisht, do të vijojë gjithë jetën, duke e bërë
për vete plotësisht njeriun, që e zgjodhi”. Benedikti XVI përfundoi duke i
ftuar prelatët brazilianë t’i përcjellin bashkësive rregulltare të dioqezës së tyre
mirënjohjen e thellë të Papës, i cili i kujton vazhdimisht në lutjet e tij.