Іспанія: кс. Ламбардзі аб “карэктных” адносінах з Мадрыдам
“Апостальская Сталіца
падтрымлівае карэктныя адносіны з іспанскім урадам, нягледзячы на яго пазіцыю ў дачыненні
да абортаў і легалізацыі гомасексуальных саюзаў”, — адзначыў у інтэрв’ю для выдання
«El Pais» прэс-сакратар Апостальскай Сталіцы кс. Федэрыко Ламбардзі SI. Інтэрв’ю публікуецца
за два дні да візіту Святога Айца Бэнэдыкта XVІ у Іспанію.
Кажучы аб стане
ўзаемаадносін, кс. Ламбардзі падкрэсліў, што Апостальская Сталіца не хавае свайго
непакою ў сувязі з неаднолькавымі меркаваннямі па фундаментальных пытаннях, такіх,
як абарона чалавечага жыцця, сям’і або разуменне свабоды веравызнання. Прадстаўнік
Ватыкана ўказаў таксама на згоду і супольны ўдзел абодвух бакоў у справе міру, сітуацыі
на Блізкім Усходзе і падабенства поглядаў на праблемы Кубы. «Папа любіць Іспанію,
як і ўсе краіны Еўропы і свету», — дадаў святар.
Кс. Ламбардзі звярнуў увагу
таксама на тое, што аддаленне ад хрысціянскіх каранёў — з’ява негатыўная, хоць гэта
датычыць і іншых краін Еўропы.
Адказваючы на пытанне аб адсутнасці сацыялістычнага
прэм'ер-міністра Хасэ Луіса Радрыгеса Сапатэра на нядзельнай святой Імшы ў Барселоне
кс. Ламбардзі адзначыў, што ніхто не змушаны ўдзельнічаць у Эўхарыстыі. “Гэты выбар,
цалкам зразумелы і яго неабходна паважаць”, - сказаў прэс-сакратар Апостальскай Сталіцы.