Lutja e Benediktit XVI në Kriptën e Vatikanit, mbi varret e Papëve.
(03.11.2010 RV)Lutje private për shpirtin e Papëve, që i paraprinë, e për të
gjithë besimtarët e vdekur. Sipas traditës, Benedikti XVI e kaloi një pjesë të mirë
të pasdites së djeshme në Kriptën e Bazilikës së Vatikanit. Në gjunjë para varreve,
ku bëjnë gjumin e mbramë ata, që i paraprinë në drejtimin e Kishës universale, por
me zemrën plot me popullin e Zotit, të përhapur në mbarë botën, nga fëmija i posapagëzuar,
te njeriu që numëron çastet e fundme të shtegtimit mbi këtë tokë. Kështu e panë dje
besimtarët Atin e Shenjtë. Përmes filigranit të ritit të shkurtër në Kriptën e Vatikanit,
u tejdukën ndjenjat e Benediktit XVI, në ditën kur mbarë bashkësia universale katolike
përkujtonte të vdekurit: “Në këtë Kriptë të Vatikanit, ia besojmë mëshirës së
Atit qiellor ata që pushojnë në paqe, në pritje të ringjalljes së korpit. Posaçërisht
Papën Gjon Pali II e Papët, të cilët kryen shërbimin e barinjve të Kishës universale,
duke u lutur që të jenë pjesëmarrës në liturgjinë e amshuar të qiellit”. Lutja
e besimtarëve, pas leximit të Psalmit, përfshiu të gjitha ndjetet e zemrës së Papës.
Lutje drejtuar Zotit që ta mbrojë Kishën; t’ua rizgjojë besimtarëve dëshirën për të
ecur në rrugën e shenjtërisë; ta ndihmojë atë, që është larg Zotit, për kthimin e
zemrës; t’i edukojë të rinjtë me dëshirën për dhurimin plot gëzim të vetvetes; t’i
japë forcë e shpresë të varfërve e të vuajturve. E kështu, deri në lutjen e fundit,
që mendimi i ringjalljes t’i shoqërojë njerëzit deri në frymën e mbrame, e mëshira
hyjnore t’i përdëllejë të gjithë të vdekurit, që kërkojnë me afsh dritën e fytyrës
së Zotit. Një lutje e plotë, gati-gati një ‘Urbi et Orbi’, drejtuar “Romës e Botës”
së mbidheshme e të nëndheshme, e fshehur në rrugëzat poshtë Bazilikës, mes radhëve
të gjata të varreve monumentale. Lutje drejtuar Romës e Botës, fare pranë varrit
të Shën Pjetrit, e përfunduar me një thirrje, që shpreh thelbin e besimit të krishterë: “...
Dëgjoje lutjen, që po të drejtojmë Ty, për të gjithë ata, të cilët e lanë këtë botë.
Hapi krahët e mëshirës sate e pranoi në shoqërinë e lumnueshme të Jeruzalemit shenjt”.