E Civitate Vaticana.
Summus Pontifex: "Migratio est et ius et obligatio" Summus Pontifex Benedictus
XVI in quodam nuntio a Sede Apostolica Mercurii die publicato scripsit Ecclesiam die
decimo sexto mensis Ianuarii anni bis millesimi undecimi Diem Mundialem Migrantium
celebraturam esse, quod causa esset, cur Ecclesia ad hanc rem eiusque in Ecclesia
et societate consectaria animos attenderet. Religionis christianae semper imprimis
esse praeceptum Iesu in Evangelium secundum Ioannem prolatum observare: "Sicut dilexi
vos, ita diligatis invicem". In nuntio quoque suo Papa principio unius familiae hominum
fulsus docet nos homines non casu alter apud alterum vivere, sed eadem via ambulare,
fratres sororesque cum simus.
Benedictus XVI: Guardini "universali in mundum
conspectu" gaudebat Benedictus XVI in Civitate Vaticana Veneris die eis, qui
ad Berolinensem Fundationem Romano Guardini dedicatam pertinent quique cuidam conventui
de hoc viro docto in Studiorum Universitate Gregoriana celebrato interfuerunt, alloquendi
causa receptis Romanum Guardini ut disputatorem catholicum "universali in mundum conspectu"
gaudentem desiderioque veritatis profundo ardentem laudibus extulit. Papa eis dixit:
"Guardini non aliquid aut multum scire volebat, sed veritatem Dei veritatemque hominis
desiderabat. Ad huic veritati accedendum adhibuit eam, ut tunc appellata est, de mundo
opinionem, quae vitalem mundi hominumque permutationem respicit. Proprium vero christianum
in eo cernitur, ut homo in necessitudine cum Deo se esse sciat, quae eum praecedit
ab quaque se non subducere potest. Non cogitationes nostrae iudicandi rationes gignunt,
sed Deus, qui eas superat et in nullam a nobis cogitandam rationem coartari potest.
Visitatio
Papae in Hispania non ad res politicas spectat Sanctuarii Compostellani necnon
Sanctae Familiae ecclesiae Barcinonenis consecratio summum sunt Summi Pontificis Benedicti
XVI a die septimo usque ad octavum mensis Novembris in Hispaniam faciendi itineris.
Secundum verba Sedis Apostolicae locutoris, Federici Lombardi nomine, Veneris die
coram diurnariis in Civitate Vaticana prolata Benedictus XVI illam aedem sacram Barcionensem
a architecto Catalogiensi Antonio Gaudi (nato anno millesimo quinquagesimo secundo,
defuncto anno millesimo nongentesimo vicesimo sexto) ecclesia consecrata ad dignitatem
basilicae elevabit. Lombardi simul confirmavit Benedictum XVI suffragiorum certatione,
quae nunc in Catalonia perageretur, respecta ea, quae locuturus esset, diligenter
ponderantem iter ad res politcas spectans non facturum esse. Lombardi dixit consilium
captum esse, ut Iosephum Ludovicum Zapatero, administrorum collegii Praesidem, brevi
iam tempore, antequam ab aeroportu Barcinonensi Romam profecturus esset, conveniret.
Papam quoque Compostellae principibus Hispanicis Philippo et Laetitiae salutem dicturum
esse. Constitutum demum est, ut ante iam Missam Barcini celebrandam regem Ioannem
Carlum et reginam Sophiam, conveniret.