Տիարպեքիր - Աղօթք՝ 1980-էն Ի Վեր Փակ Մնացող Ս. Կիրակոս Եկեղեցւոյ Մէջ

Արամ արք. Աթեշեան նշած է, որ Աղթամարի Ս. Խաչ եկեղեցիէն ետք այս եկեղեցին ամէնէն կարեւորն է հայութեան համար։ Անիկա Միջին Արեւելքի մեծագոյն եկեղեցին է, ունի 1400 քմ. աղօթատեղի։ Արամ սրբազանը յոյս յայտնած է, որ յառաջիկայ տարի հանդիսաւոր կերպով Ս. պատարագ կը մատուցուի այնտեղ

Տիարպեքիր քաղաքի հայկական Ս.Կիրակոս եկեղեցւոյ մէջ աղօթք կատարուեցաւ՝ Հայ առաքելական եկեղեցւոյ Պոլսոյ հայոց պատրիարքի փոխանորդ Արամ արք. Աթեշեանի կողմէ։ Այս արարողութեան մասնակցած են Տիարպեքիրի Ս. Կիրակոս եկեղեցւոյ հիմնադրամի նախագահ Թեքին Փափուչեան, գրող Մկրտիչ Մարկոսեան, Տիրպեքիրի քաղաքապետ Օսման Պայտեմիրը եւ Թուրքիայէն, Սուրիայէն եւ Եւրոպայի զանազան շրջաններէն ժամանած հայեր։

Հայերուն կողքին աղօթքին մասնակցած է նաեւ Տիարպեքիրի քիւրտ քաղաքապետ Օսման Պայտեմիրը, որ նշած է, թէ հայերը շրջանին մէջ իրաւունքներ ունին այնքան, որքան ինք։ Մեր մարգարէները տարբեր են, բայց դուք մեր եղբայրներն էք։ Խնդրեմ ընդունիք իմ եղբայրութիւնս։ Ես պարզ եւ անկեղծ կըսեմ այս բոլորը։ Ձեզի նկատմամբ ես պարտական եմ, որովհետեւ այս քաղաքը ձերն է, որքան իմս։

Նշենք, որ Տիարպեքիրի Ս. Կիրակոս եկեղեցին 1980 թուականէն ի վեր ձգուած է իր ճակատագիրին։ Աւելի ուշ Տիարպեքիրի մէջ ապրող հայերը ստեղծած են Ս. Կիրակոս հիմնադրամը, որպէսզի կարելի ըլլայ եկեղեցին վերանորոգել։ 2.5 միլիոն տոլար արժող վերանորոգութեան ծախսերուն 70 առ հարիւրը հոգացած է հայկական հիմնադրամը, իսկ 30 առ հարիւրը՝ Տիարպեքիրի քաղաքապետարանը։