Tekstet e Sinodit përkthehen në hebraisht në kanalin e internetit të Radio Vatikanit.
(31.10.2010 RV)Një ndër risitë, lidhur me Sinodin e ipeshkvijve për Lindjen
e Mesme, që përfundoi javën e kaluar, ishte prania e gjuhës hebraike, mes gjuhëve
të tjera, me të cilat Radio Vatikani përktheu shumë tekste të takimit të madh lindor,
duke i pasqyruar edhe në kanalin e vet shumëgjuhësh të internetit. Punë e kryer me
durim të madh nga Hana Bendkovski, hebreje e Jeruzalemit dhe një nga përgjegjëset
e Qendrës së Jeruzalemit për Marrëdhëniet Judeo-Kristiane”. Ta dëgjojmë:
R. – The
idea was that the Israeli public would be able to be informed about … Ideja
ishte që opinioni publik izraelit të merrte vesh ç’po ndodhte në gjirin e Kishës katolike,
me që bëhej fjalë për një ngjarje, e cila kishte të bënte me Lindjen e Mesme. Lidhet,
besoj, edhe me faktin se në të kaluarën gjithçka ndodhte në Vatikan, në Kishën katolike,
e që ritransmetohej nga mediat e botës izraelite në mënyrë, të themi jo korrekte,
interpretohej, më pas, keq nga vetë izraelitët. E me që marrëdhëniet e hebrenjve me
të krishterët, posaçërisht me Kishën katolike, janë tejet delikate, mendoj se kishte
rëndësi të dorës së parë për Kishën katolike të sigurohej se këtë herë informacioni
mbi ngjarjen e madhe do të ishte korrekt, nga që do të vinte drejtpërdrejt nga vetë
Kisha katolike e në hebraisht, në mënyrë që të shmangej çdo keqkuptim ose gabim përkthimi
e izraelitët të kuptonin, kështu, me vërtetësi, ç’po ndodhte në Kishë. Mos të harrojmë,
në kanalin e internetit të Vatikanit, materialet e Sinodit u përkthyen në gjashtë
gjuhë, plus armenishtes e hebraishtes. E kjo është e vetmja gjuhë, që nuk u drejtohet
katolikëve. Ndonëse shtypi i Izraelit nuk u interesua për atë që po ndodhte në Sinod,
pati edhe gazetarë izaelitë nga më të rëndësishmit, që e zbuluan dhe e shfrytëzuan
kanalin. Mendoj se më shumë rëndësi ka mesazhi drejtuar izraelitëve: nuk duam t’i
ungjillëzojmë, por dëshirojmë që ta ndjejnë veten më pranë Kishës, ta dinë se kujdesemi
për ta, si për besimtarët e një feje, të cilën e konsiderojmë si motër të madhe të
fesë sonë!