Njëqind mijë të rinj të Veprimit Katolik në Sheshin e Shën Pjetrit. Papa: vetëm në
Krishtin gjejmë dashurinë e vërtetë e lirinë e vërtetë.
(31.10.2010 RV)Një festë feje, një çast gëzimi e entuziazmi: këtë atmosferë
jetoi dje Sheshi i Shën Pjetrit, i pushtuar nga njëqind mijë të rinj të Veprimit Katolik.
Një ngjarje, që u përqendrua tek tema: “Ka edhe më. Do të bëhemi të mëdhenj së bashku”,
e që arriti kulmin në takimin e djeshëm me Benediktin XVI. Në dialogun e të rinjve
me Papën, u prekën tema të forta, si dashuria, edukimi dhe dëshmia ungjillore në jetën
e përditshme.
“Kini guximin
të mos e lini asnjë mjedis pa Jezu Krishtin!”- kjo është detyra që u ngarkoi Papa
të rinjve të Veprimit Katolik, duke iu përgjigjur tri pyetjeve, drejtuar nga vetë
të rinjtë dhe dukatorët e tyre, të nisur nga tema e takimit: “Ka edhe më”. Benedikti
XVI theksoi se të rritesh, nuk do të thotë vetëm të hedhësh shtat. E u besoi edhe
një kujtim personal: “Unë, kur isha djalë, në moshën tuaj, isha më i vogli
në klasë e kisha shumë dëshirë të bëhesha, një ditë, shumë i madh, e jo vetëm me shtat,
por edhe me punë. Dëshiroja të bëja diçka të madhe në jetë, edhe pse nuk i dija fjalët
‘Ka edhe më!”. Më pas Papa nënvizoi ç’do të thotë të jesh vërtet i madh,
ose më mirë të themi, të rritesh përmes miqësisë me Jezusin. Një mësim, që na e jep
vetë Krishti në Ungjill, kur i qorton të rriturit e u thotë: “Lërini këtu të gjithë
fëmijët, sepse kanë në zemër sekretin e Mbretërisë së Hyjit: “Kështu Jezusi
u mësoi të rriturve se edhe ju jeni të mëdhenj e se ata duhet ta ruajnë madhështinë
tuaj, dmth zemrën tuaj, që e do fort Zotin”. Duke iu përgjigjur pyetjes
së dytë mbi kuptimin e vërtetë të fjalës dashuri, Papa i porositi të rinjtë të ruhen
nga mesazhet e gabuara, që ua propozon shoqëria: “Është e vërtetë: ju nuk
mund e nuk duhet të pranoni një dashuri që përdoret si mall tregu, për t’u shitur
pa pikë respekti për vetveten e për të tjerët, që ju bën të paaftë për të qenë e pastër.
Kjo nuk është liri. Shumë nga “dashuritë”, propozuar prej mediave në internet, nuk
janë dashuri, po egoizëm, ëndërr e çastit, që nuk ju bën të lumtur, nuk ju bën të
mëdhenj, por ju lidh si vargua, që ju mbyt mendimet e ndjenjat më të bukura, rrahjet
më të vërteta të zemrës, duke ju larguar nga dashuria e vërtetë, e cila gjen shprehjen
e vet më të lartë në Jezu Krishtin, e në Shpirtin Shenjt gjen forcën e zjarrin, që
i ndez jetët tuaja, mendimet tuaja, ndjenjat tuaja”. Përgjigjja e tretë
iu kushtua edukatorëve, të cilët Papa i porositi të impenjohen me të gjitha forcat
për të mirën e të rinjve. E, në çastin e ndarjes, Benedikti XVI iu përgjigj me
dashuri entuziazmit të madh të të rinjve: “Edhe unë jam plot me gëzim! E
ndjej veten të rinuar. Ju falënderoj me gjithë zemër!”.