Papa ipeshkvijve të Brazilit: mbroni jetën njerëzore, pa pasur frikë nga opinionet
e kundërta
(28.10.2010 RV)Sistemi shoqëror
e politik, që nuk e mbron jetën e njeriut, bazohet mbi të drejta “të rreme, që krijojnë
iluzione”. Të krishterët duhet ta përdorin votën e tyre në mbrojtje të së mirës së
përbashkët. Këto ishin reflektimet e Papës në takimin e paradites së sotme, me ipeshkvijtë
brazilianë në vizitë “ad Limina”. Benedikti XVI bëri thirrje për lirinë e mësimit
të fesë katolike në shkollat shtetërore dhe për mbrojtjen e simboleve fetare në jetën
publike.
E simboli, që shpreh më shumë se të gjithë shpirtin e vërtetë
të Brazilit, është Krishti me krahët hapur, që dominon Gjirin e Guanabarës në Rio
de Zhaneiro. Për Papën, feja e brazilianëve është shenjë shprese për të sotmen e të
ardhmen e vendit, por të dyja, rrezikohen nga “hijet” e krijuara prej forcave, që
përhapin vlera të papranueshme moralisht, duke cënuar natyrën e shenjtë të njeriut.
Barinjtë e Kishës, nënvizoi Ati i Shenjtë, e kanë për detyrë ta ngrenë zërin, sidomos
kur këto lloj vlerash kthehen në çështje politike e shndërrohen në ligje: “Do
të ishte iluzion i plotë dhe e rreme, çdo e drejtë njerëzore, politike, ekonomike
dhe shoqërore, që nuk përfshin mbrojtjen energjike të së drejtës për jetën nga zënia
në vdekjen e saj të natyrshme. Gjithnjë në kuadrin e përpjekjeve në favor të më të
dobtëve e më të pambrojturve, kush është më i pambrojtur se një fëmijë, që nuk ka
lindur ende, ose një i sëmurë në gjendje vegjetative, apo në prag të vdekjes?” Ja
përse, nguli këmbë me forcë Papa, Zoti duhet të ketë vendin e vet në sferën publike,
në veçanti në fushën kulturore, shoqërore, ekonomike dhe sidomos në atë politike.
T’u jepet hapësirë, këshilloi Benedikti XVI, laikëve të formuar me fe, për të dëshmuar
në shoqëri impenjimin e tyre të krishterë. E kur është e nevojshme, vazhdoi Ati i
Shenjtë: “Barinjtë e Kishës duhet t’u kujtojnë të gjithë qytetarëve të drejtën,
që është edhe detyrë, për të përdorur lirisht votën në promovimin e së mirës së përbashkët”. Benedikti
XVI bëri më pas një thirrje në favor të mësimit të fesë në shkollat shtetërore, duke
theksuar se në ndryshim nga prirjet e tjera, vetëm respektimi, nxitja dhe kuptimi
i natyrës trashendente të njeriut mundëson ndërtimin e një shoqërie të vërtetë: “Kur
projektet politike përmbajnë, haptas ose fshehtas, depenalizimin e abortit ose të
eutanazisë, ideali demokratik – që është vërtet i tillë, kur njeh dhe mbron dinjitetin
e çdo njeriu – tradhtohet që në bazë. Prandaj, të dashur vëllezër ipeshkvij, për të
mbrojtur jetën nuk duhet të kemi frikë kundërshtimet dhe humbjen e popullaritetit,
duke refuzuar çdo kompromis dhe dyfytyrësi, që do të na shndërronin sipas mentalitetit
të kësaj bote”. Benedikti XVI mbrojti më pas praninë e simboleve fetare në
jetën publike. Këto shenja, përfundoi Papa, kanë vlerë të veçantë në Brazil, ku feja
katolike është pjesë përbërëse e historisë së vendit.