“Ëndërrova një botë pa kancer.” – promovohet libri që ilustron përparimet e fundit
në luftën kundër kësaj sëmundjeje.
(26.10.2010 RV)U paraqit sot pasdite në Romë, libri “Ëndërrova një botë pa
kancer” - i cili përmbledh të dhënat, zbulimet e përparimet më të fundit që janë arritur
në fushën e luftës kundër kësaj sëmundjeje. Në mikrofonin tonë të dëgjojmë autorin,
kryetar i Shoqatës italiane kundër leuçemive, Franko Mandeli:
Përgjigje: “Të
ëndërrosh një botë pa kancer” nuk do të thotë se nuk do të ketë më kancer, por që
tumoret e gjakut të jenë të mjekueshme, domethënë të ekzistojë mundësia që në shumicën
dërrmuese të rasteve të gjendet një kurë që i bën të sëmurët të jetojnë normalisht.
Pyetje:
Profesor, cilat janë përparimet që janë bërë këto vitet e fundit në diagnostikimin
dhe në mjekimin e leuçemive?
Përgjigje: Unë kam filluar të kurojë leuçemitë
akute tek fëmijët atëherë kur nuk shërohej askush. Sot, shërohen rreth 80% prej këtyre
fëmijëve. Në libër janë përfshirë edhe disa histori që lidhen me fëmijët e parë që
u shëruan, atëherë kur ne arrinim një përgjigje pozitive dhe vërenim se fëmija ishte
mirë, por nuk shpresonim kurrë që të ishte shëruar plotësisht, ashtu sikurse në fakt
ndodhi, më vonë. Ja, kështu kanë ndryshuar gjërat edhe për shumë sëmundje të tjera.
Për shembull përsa i përket linfomave, të cilat dikur mund të mjekoheshin vetëm në
disa raste por që sot mund të shërohen në disa mënyra. Duhet të them se po punojmë
mjaft për cilësinë e jetës të pacientit, duke u përpjekur, që nëse i sëmuri nuk shërohet
atëherë, së paku ta bëjmë të jetojë me sëmundjen që ka, por pa pasur probleme të mëdha
dhe duke bërë pra një jetë të zakonshme me sëmundjen që ka për disa dhjetëvjeçarë.
Kjo nuk është ëndërr, por realitet, që tani madje.
Pyetje: Profesor, cili është
synimi e këtij libri?
Përgjigje: Po, janë disa. I pari është sigurisht që të
përpiqemi të mbledhim fonde nëpërmjet të drejtave të autorit dhe të gjitha të ardhurat
t’i kalojnë “Shoqatës italiane kundër leuçemive”. Ka një listë nismash të kësaj shoqate,
ndër të cilat bëjnë pjesë edhe dy nisma krejt të jashtëzakonshme: e para lidhet me
asistencën në shtëpi, pra, që i sëmuri të niset në shtëpi të vet dhe mos të mbahet
i shtruar në spital, kur kjo gjë nuk është e nevojshme. E dyta, banesat për ata të
sëmurë që jetojnë larg spitaleve, që këtyre t’u jepet mundësia të shtrohen falas.
Ndoshta synimi kryesor është që pacientët mos ta ndiejnë më veten të braktisur.
Pyetje:
Profesor, po, cilat janë sfidat e tanishme në kuadrin e kërkimeve shkencore në këtë
fushë?
Përgjigje: Të kryhen kërkime klinike të pavarura, siç po bëjmë ne me
një grup, që quhet “Gimema”, duke u vënë në dispozicion të Protokolleve të përbashkëta,
të pavarur, pra, nga shtëpitë farmaceutike.