Sot, e diel 24 tetor, Kisha kremton të dielën e 30-të gjatë vitit kishtar,
cikli i tretë. Po sot më 24 tetor kalendari përkujton edhe Shën Antonin Maria Klaret,
ipeshkëv e themelues I Kongregatës së Bijave të Zemrës së Papërlyer të Marisë. Liturgjia
e ditës na fton ta adhurojmë çdo ditë Zotin në banesën e tij të shenjtë, pa harruar
se nuk mjaftojnë monumentet e krishtera, as turmat, për të thënë të vërtetën e fesë
së krishterë. Duhet ta lavdërojmë Zotin me gjithë jetën tonë.
Nesër e hënë
25 tetor, sipas kalendarit Kishtar bie përkujtimi i shenjtorëve Krispini e Krispiniani,
Kristani e Darja, martirë. Liturgjia e kësaj dite na kujton se gjithçka kemi, mund
të bëhet mjet shëlbimi ose pengesë në rrugën tonë drejt mbretërisë qiellore e se dashuria
jonë për Zotin duket në gjërat e vogla, të përditshme.
Të martën e ardhshme
më 26 tetor, bie përkujtimi i shën Dhimitrit, martir. Liturgjia e ditës na fton
t’i kërkojmë Zotit gjënë më të çmuar: Fenë e vërtetë që shëlbon.
Të mërkurën
më 26 tetor, kalendari do të përkujtojë shën Evaristin, papë e shën Frumencin,
ipeshkëv e apostull i Etiopisë. Në festën e tyre jehon rishtas fjala e re që u dëgjua
për herë të parë në sinagogën e Kafarnaumit, fjalë që e trandë dhe e çliron ndërgjegjen,
fjala e Krishtit, Zotërisë së Kishës. Të enjten më 28 tetor kalendari Kishtar
përkujton shenjtorët Simeoni e Juda, apostuj. Na kujton se të kesh fe, do të thotë
t’i besosh Zotit e të lëshohesh plotësisht në dorë të tij, edhe në çastet e rënda
të provës, ashtu si bëri Moisiu. Duhet ta dimë mirë se e keqja nuk na vjen kurrë nga
Zoti, madje ai na rri gjithnjë pranë e nuk na braktis kurrë.
Të premten
që vjen më 29 tetor, do të përkujtohen Shën Feliçiani, martir i Kartagjenës
dhe Shën Ermelinda. Liturgjia e kremtimit të tyre na kujton se Jezusi, me mrekullitë
e tij, vë në dukje sa brishtësinë njerëzore, aq dhe lajmin e mirë se ka ardhur për
të na bërë të lirë e të fortë. Me fjalët e tij Krishti i çjerr maskën hipokritëve,
që shkojnë nga fryn era e pas interesave vetjake, tepër larg vullnetit të Atit, të
Birit e të Shpirtit Shenjt.
Liturgjia e së shtunës më 30 tetor, kur
do të përkujtohet Shën Gjermani, ipeshkëv i Kapuas, na fton të reflektojmë për mbretërinë
e Zotit, që është e e fshehur në histori: vetëm feja dhe shpresa e krishterë u krijojnë
besimtarëve mundësinë ta dallojnë e t’i shërbejnë, me bindjen se forca e fshehur e
Shpirtit Shenjt do ta bëjë këtë mbretëri të dukshme në kohë e do ta shndërrojë mbarë
botën. Të dielën e ardhshme më 31 tetor, Kisha kremton
të dielën e 31-të gjatë vitit kishtar e po më 31 tetor kalendari përkujton edhe shën
Rodriguezin, rregulltar jezuit dhe shën Alfonsin (emri i të cilit në gjuhën shqipe
ka marrë trajtat Ukë e Ukshin). Liturgjia na kujton se Hyji është këngë e shpëtim
për ata që i besojnë me gjithë zemër. E vetëm Zoti mund të na e thotë kush shëlbohet
e kush jo! Ne mundemi vetëm të përpiqemi për t’u shëlbuar, duke e lënë Zotin të na
prijë me fjalën e tij. Në se do të jetojmë ashtu si na mëson Ai, sigurisht do të hyjmë
edhe në mbretërinë e amshuar.