Faqe të pasura me argumente dhe me dashuri: koment për letrën e Papës drejtuar seminaristëve
Kush dëshiron të bëhet meshtar duhet të jetë, para së gjithash, njeri i Zotit. Hyji
nuk është ndonjë hipotezë e largët, nuk është i panjohuri, i cili është tërhequr në
skutën e vet pas “big bang”-ut. Kjo është një nga pjesët më të rëndësishme të letrës,
që Papa Benedikti XVI u drejtoi javën e kaluar seminaristëve të mbarë botës. Ati i
Shenjtë preku sërish temën e shpërdorimeve seksuale në Kishë, duke theksuar se pavarësisht
nga kjo, misioni meshtarak mbetet i madh dhe i pastër. I kërkuam një koment për këtë
letër rektorit të Seminarit të Madh Papnor të Romës, imzot Xhovani Tani: Letra më bëri
një surprizë të bukur. Surprizë për faktin se është shkruar e pastaj, edhe për mënyrën
si është shkruar, për ngrohtësinë me të cilën Papa u drejtohet seminaristëve e për
mendimin që shpreh, duke prekur pika të rëndësishme të formimit. Papa shkruan
se meshtaria nuk është “profesion” i së kaluarës, por i së tashmes dhe i së ardhmes.
Si i përgatisni seminaristët për shoqërinë bashkëkohore, e cila i është larguar disi
Kishës… Mendoj se linja kryesore është t’u japim atyre të kuptojnë të vërtetën
e fesë dhe bukurinë e takimit me Krishtin, si element përbërës i rëndësishëm i përvojës
personale. Vetëm kështu arrijnë t’ua propozojnë Jezusin të tjerëve. Gjatë
kohëve të fundit, nëpër seminare besoj se është folur mbi temën e shpërdorimeve seksuale
të klerit. Cila është përvoja juaj në Seminarin e Madh të Romës? Nga njëra
anë, përvojë e dhimbshme natyrisht, për ç’na dëgjonin veshët, por nga ana tjetër,
edhe përgjegjësi: e kuptojmë se rruga e formimit duhet të jetë serioze. Kemi bërë
disa takime me ekspertë, me persona, të cilët na e kanë paraqitur problemin në aspekte
të ndryshme, në mënyrë që të jemi të vetëdijshëm për këtë. Nuk duhet ta injorojmë
çështjen. Çdo i ri është bir i epokës së vet e kjo e jona e bën veshin e shurdhër
kur flitet për moralin. Si u mësoni seminaristëve vlerën e celibatit, të cilën Papa
e thekson edhe në letër? Linja e përvijuar nga Papa është ajo që ndjekim edhe
ne. Pra, celibati, seksualiteti, nuk duhet të trajtohen si diçka jashtë personit.
Krejt bota e dashurisë, e pasionit duhet të realizohet si objektiv, në takimin me
Krishtin. Atëherë, të përpiqemi ta bëjmë jetën shpirtërore veçanërisht intensive.
Askush s’mund të thotë: unë e kam vendosur kështu. Ose: ma kërkon Kisha e atëherë
jam dakord. Duhet punë, që secili ta kuptojë mirë se ç’ka brenda si energji seksuale
e dashurore e të arrijë t’i japë drejtimin e mbarë.