Papa njofton se do të krijojë 24 kardinaj në koncistorin e 20 nëntorit
(20.10.2010 RV)Sot paradite, në audiencën e përgjithshme, Benedikti XVI njoftoi
se më 20 nëntor do të mbledhë një Koncistor, gjatë të cilit do të krijojë 24 kardinaj.
Ndërmjet tyre, 20 me të drejtë zgjedhore. Kardinajtë e rinj vijnë nga katër kontinente:
15 janë evropianë; katër, afrikanë; 4 amerikanë; një aziatik. Me koncistorin e ri,
numri i kardinajve do të jetë 203, nga të cilët, 121 me të drejtë për të zgjedhur
Papën e edhe për t’u zgjedhur në fronin e Shën Pjetrit.
Lajm i gëzueshëm për
Kishën. Benedikti XVI, në një atmosferë festive, njoftoi gjatë audiencës së përgjithshme
se do të krijojë 24 kardinaj të rinj. Nënvizoi, sidomos, rëndësinë që kanë kardinajtë
për jetën e Kishës e, në mënyrë të posaçme, për vetë Papën: “Kardinajtë kanë
për detyrë ta ndihmojnë Pasardhësin e Apostullit Pjetër në kryerjen e misionit të
tij për mbrojtjen e parimeve e të themeleve të përhershme e të dukshme të unitetit
të fesë e të bashkimit të Kishës”. Në Koncistorin e ardhshëm, i treti i papnisë
së Benediktit XVI, do të marrin kësulën kardinalore imzot Anxhelo Amato, prefekt
i Kongregatës për çështjet e shenjtorëve; imzot Mauro Piaçenca, prefekt i Kongregatës
për Klerin; imzot Xhanfranko Ravazi, kryetar i Këshillit Papnor të Kulturës;
imzot Fortunato Baldeli, Kryependestar; imzot Velazio de Paolis, kryetar
i Prefekturës për çështjet ekonomike të Selisë së Shenjtë. Gjithnjë nga klerikët
e Kuries, do të krijohen kardinaj kryeipeshkvi amerikan Raimond Leo Burke,
prefekt i Senjaturës Apostolike; prelati sviceran Kurt Koh, kryetar i Këshillit
Papnor për nxitjen e bashkimit të të krishterëve; imzot Robert Sarah, i Guinea-
Konakri-së, kryetar i Cor Unum. Do të krijohen kardinaj edhe imzot Paolo Sardi,
Pro-patron i Urdhërit të Maltës, dhe imzot Françesko Monterizi, kryeprift
i Bazilikës së Shën Palit.
Ndërmjet ipeshkvijve, që kryesojnë dioqeza, do të
krijohen kardinaj imzot Paolo Romeo, kryeipeshkëv i Palermos; imzot Reinhard
Marks, kryeipeshkëv i Munih- Frizingës në Bavari si dhe imzot Kazimierz Nyç,
kryeipeshkëv i Varshavës. E akoma, imzot Donald V. Vuerl, kryeipeshkëv i Uashingtonit;
imzot Lorent Monsenguo Pasinia, kryeipeshkëv i Kinshasës; imzot Medard Jozef
Mazombve, kryeipeshkëv nderi i Luzakës; imzot Malkolm Ranjith Patabendige Don,
kryeipeshkëv i Kolombos; imzot Raimund Damasheni Asiz, kryeipeshkvi brazilian
i Aparesidës; imzot Raul Eduardo Vela Kiriboga, kryeipeshkëv nderi i Kuitos
dhe Patriku i Koptëve të Aleksandrisë, Anton Naguib. Së fundi Papa do të
krijojë edhe katër kardinaj, që i kanë kaluar të 80-tat e që do të kenë vetëm të drejtë
këshillimore në Konklav. Janë: imzot Hosè Manuel Estepa Llaurens, spanjoll,
kryeipeshkëv nderi në ushtri; imzot Elio Sgreçia, ish-kryetar i Akademisë Papnore
për Jetën; imzot Domeniko Bartoluçi, ish-mjeshtër i Kapelës Sikstine dhe imzot
Valter Brandmyler, gjerman, ish-kryetar i Komitetit Papnor të shkencave historike.
Papa nënvizoi se larmia e vendeve nga vijnë kardinajtë, pasqyron qartë universalitetin
e Kishës: “Në listën e kardinajve të rinj pasqyrohet universaliteti i Kishës;
ata vijnë nga të katër anët e botës e kryejnë detyra nga më të ndryshmet në shërbim
të Selisë së Shenjtë e në lidhje të drejtpërdrejtë me popullin e Zotit, si Etër e
Barinj të Kishave të veçanta. Ju ftoj të luteni për kardinajtë e rinj, duke i kërkuar
porsaçërisht Virgjërës Mari, Nënës së Shenjtnueshme të Zotit, të ndërmjetësojë që
ta kryejnë me fryt detyrën në Kishë”. Kujtojmë se Papa vendosi edhe një rregull
të ri, që i kufizon emërimet kardinalore; ka të bëjë me ato seli dioqezane, që kryesohen
nga një ipeshkëv i ri, ndërsa vijon të kryejë detyrën edhe një ipeshkëv nderi, kardinal,
nën moshën 80 vjeç. Ky kriter, e kufizon zgjedhjen e menjëhershme kardinalore të
ipeshkvit të ri. Ndërsa kriteri tjetër i rëndësishëm, është ai i universalitetit
të kardinajve.