Сінод Біскупаў для Блізкага Усходу выступае з экуменічнымі ініцыятывамі
Выніковае пасланне
пасяджэння Сіноду Біскупаў для Блізкага Усходу было тэмай абмеркавання ўдзельнікаў
17 кастрычніка 2010 г. Праект дакумента прадставілі кіраўнікі рэдакцыйнай камісіі
Сіноду: мелхіцкі арцыбіскуп Кірыл Салім Бустрос і біскуп Вільям Шомалі з Іерусаліма.
«Мы горача жадаем узгаднення даты Вялікадня з Праваслаўнай Царквой», — адзначыў
біскуп Шомалі. Іерарх выказаў прапанову, каб католікі ўзгаднілі з праваслаўнымі і
посныя практыкі, нагадаўшы, што пост цэніцца таксама ў ісламе і іўдаізме. «Супольны
для католікаў усіх абрадаў час і спосаб посту быў бы пазітыўным знакам як для вызнаўцаў
Хрыста, так і для нехрысціянскіх вернікаў», — падкрэсліў дапаможны біскуп з Іерусаліма.
Выступоўца дадаў, што католікі лацінскага абраду на Блізкім Усходзе дыхаюць «абодвума
лёгкімі» Касцёла, аб якіх казаў папа Ян Павел ІІ, а менавіта ўсходняй і заходняй традыцыямі.
Арабскія католікі з лацінскага Касцёла ў гэтым рэгіёне цалкам ідэнтыфікуюць сябе з
яго абрадам, але адначасова адчуваюць сябе ў поўнай меры людзьмі Усходу. У прыватнасці,
з усходняй традыцыі яны чэрпаюць у практыцы літургічных спеваў.
Як было адзначана,
католікі рэгіёну, а таксама пратэстанты святкуюць Вялікдзень згодна з грыгарыянскім
календаром. У той жа час усе праваслаўныя разам з часткай Касцёлаў на Усходзе адзначаюць
гэтую дату паводле юліянскага календара. Розніца паміж гэтым складае ад тыдня да месяца
і нават больш. Узгадненне даты Вялікадня неаднаразова было тэмай абмеркавання Сіноду.
Акрамя гэтага, была закранута тэма патрэбы прыняцця адзінага для ўсіх хрысціян рэгіёну
арабскага перакладу малітвы «Ойча наш». Высілкі ў гэтым кірунку працягваюцца на Блізкім
Усходзе ўжо некалькі гадоў.