Papa ambasadorit të El Salvadorit: Kisha nuk mund të qëndrojë indiferente para të
këqiave të shoqërisë
(18.10.2010 RV)Papa priti sot edhe ambasadorin e ri të El Salvadorit pranë
Selisë së Shenjtë, Manuel Roberto Lopez Barrera, i cili paraqiti Letrat Kredenciale.
Benedikti XVI nënvizoi trashëgiminë e krishterë të vendit dhe rolin e rëndësishëm
të Kishës në promovimin e paqes e të zhvillimit. Në vitin 1992, El Salvadori doli
nga një luftë, që zgjati 10 vjet. Tani po vazhdon procesin e pajtimit të brendshëm,
por ekonomia akoma është e dobët, me një borxh të jashtëm mjaft të madh, me një tregues
të lartë kriminaliteti dhe analfabetizmi. Papa kujtoi se Kisha nuk mund ta shohë
me indiferencë këtë gjendje, prandaj impenjohet, sipas kompetencave të saj, për të
mirën e përbashkët. Benedikti XVI bëri thirrje për arritjen e pajtimit të plotë, pasi
dhuna, theksoi, është rrugë pa krye, që çon drejt destabilizimit të vendit. Ati i
Shenjtë vuri në dukje rolin e forcave të rendit për të garantuar ligjshmërinë dhe
mirëqënien e popullsisë. Së fundi, përmendi praninë agresive të sekteve, të cilat
duken si përgjigje e lehtë ndaj etjes për Zotin, por minojnë kulturën dhe zakonet,
që kanë plazmuar për shekuj me radhë identitetin e krishterë të El Salvadorit.