Ngjarja më e rëndësishme e javës së kaluar në Vatikan është pa dyshim Sinodi i ipeshkvijve
për Lindjen e Mesme, i cili filloi më 10 tetor e do të përfundojë më 24 të këtij muaji.
Tema e diskutimit, në praninë e Papës Benedikti XVI, është “bashkimi dhe dëshmia”.
Kësaj jave dolën në pah problematikat e të krishterëve në Lindjen e Mesme, rrugët
e dialogut ekumenik e ndërfetar dhe impenjimi i Kishës në planin shoqëror. Po ju propozojmë
mendimin e dy eksponentëve të botës myslimane, të pranishëm në Sinod. Së pari, suniti
Muhamad al-Samak, këshilltar politik i Muftiut të Madh të Libanit: “Mirëkuptim
i ndërsjelltë: qëndrueshmëria e botës mund të arrihet vetëm nëse të gjithë mund të
jetojnë pa frikën e tjetrit. Është thelbësore që besimtarët e çdo feje të mund të
ushtrojnë të drejtat e tyre pa turp. Sigurisht, gjatë kohërave, ka pasur çaste të
errëta në marrëdhëniet ndërmjet të krishterëve dhe myslimanëve e akoma mbijetojnë
pikpamje reaksionare, por ka vende islamike ku të krishterët jetojnë krah për krah
me myslimanët. Kjo është rruga, që duhet ndjekur” I bëri jehonë këtyre fjalëve
edhe shiiti Ajatollah Seved Mostafa Mohageg Ahmadabadi, pedagog i jurisprudencës në
Universitetin e Teheranit: “Bashkëndajmë vuajtjet e të krishterëve. Jemi të
thirrur të punojmë sëbashku, duke respektuar të drejtat dhe detyrat, në luftën kundër
ekstremizmit, në promovimin e kulturës së miqësisë e të faljes. Pasi në Lindje, prania
e krishterë, që bashkëvepron me Islamin është domosdoshmëri për botën mbarë”.