Editorial i atë Federiko Lombardit: “Një festë për jetën”
Bënë xhiron e globit imazhet e javës së kaluar, që pasqyronin operacionet e shpëtimit
e të nxjerrjes nga galeria të 33 minatorëve, të cilët ishin bllokuar në një minierë
të Kilit që prej 2 muajsh. E gjithë bota e jo vetëm Kili, mori pjesë në festën e transmetuar
nga televizioni. Kësaj ngjarjeje ia kushton komentin javor, zëdhënësi i Vatikanit,
atë Federiko Lombardi, drejtori i përgjithshëm i Radios sonë:
“Disa ditë
më parë një i ri nga Kili, në fund të audiencës, i dha Papës një flamur të vendit
të vet, që mbante firmat e 33 minatorëve. Papa e mbajti në apartamentin e vet, duke
kujtuar çdo ditë në lutje ata njerëz, deri në çastin e lirimit, që erdhi më në fund. Thuhet
se mëse një miliard njerëz ndoqën me pasion fazën e lirimit, pasi kishin marrë pjesë
në dy muajt e mëparshëm në shqetësimet e shpresat e minatorëve, të familjeve të tyre,
të punëtorëve që përpiqeshin t’i nxirrnin nga thellësitë e galerisë ku ishin bllokuar
e të gjithë Kilit. Lirimi i tyre qe festë e madhe. Bukur, që në këtë botë,
akoma dimë të interesohemi kaq shumë për një ndërmarrje të jashtëzakonshme, e cila
u bë për të shpëtuar jetë njerëzish. Del në dritë vetëdija për vlerën e jetës e fuqia
e mediave i lejoi njerëzimit të marrë pjesë në përpjekjen në favor të saj. Mirë
fort! Ndërsa gëzohemi për horizontin e ri të jetës së 33 vetëve, në sfond mbetet kujtimi
për minatorë të tjerë të panumërt, që në vende të ndryshme të botës kanë tjetër fat,
për shkak të fatkeqësive e kushteve të pasigurta të punës. Mbetet mendimi për shumë
njerëz, që vdesin të harruar, ose të pavlerësuar. Impenjimi i mrekullueshëm i inteligjencës
dhe i pasionit për të shpëtuar 33 jetë, a nuk duhet shumëfishuar për të shpëtuar edhe
shumë të tjera? E mediat, a nuk duhet të vazhdojnë ta përfshijnë botën në impenjimin
për jetën?”