Dialogu ekumenik dhe ndërfetar, në qendër të punimeve të sotme të Sinodit për Lindjen
e Mesme. Dy përfaqësues myslimanë priten në audiencë nga Papa.
(15.10.2010 RV)Dialogu ekumenik dhe ndërfetar ishte në qendër të punimeve të
Sinodit kushtuar Lindjes së Mesme, që vijon në Vatikan me temën “bashkim e dëshmi”.
Në praninë e Benediktit XVI, sot paradite u mbajt takimi i tetë i përgjithshëm, gjatë
të cilit u ndoqën diskutimet e delegatëve vëllezër, që sollën në sallën e mbledhjes
së madhe përshëndetjen e Këshillit Ekumenik të Kishave. Salla ndoqi me vëmendje
edhe dy specialistë myslimanë, të ftuar në Sinod: sunitin Muhamad al-Sammak, këshilltar
politik i Myftiut të Madh të Libanit dhe shiitin Ajatollah Sejed Mustafa Mohageg Ahmadabadi,
pedagog i drejtësisë pranë universitetit të Teheranit. Të dy u pritën në audiencë
nga Ati i Shenjtë.
Të punohet me frymën e bashkimit për të mirën e të krishterëve
në Lindjen e Mesme, në optikën e Kishës universale, të bazuar mbi Eukaristinë; të
kremtohen bashkërisht Pashkët, t’u kushtohet një ditë feste martirëve të Lindjes.
Shfletohen kështu një nga një faqet, që përmbajnë problemet më të mprehta të dialogut
ekumenik, pa harruar theksin mbi domosdoshmërinë e përfundimit të konfliktit izraelito-palestinez,
për të vendosur paqen në zonë. Por dialogu duhet shtrirë edhe ndërmjet feve, nënvizojnë
ipeshkvijtë, duke kujtuar se vendet islamike nuk duhen parë si vende terroriste. Lidhur
me këtë, Salla kërkon të promovohet një rezolutë e OKB-së mbi lirinë fetare, që ta
mbrojë njerëzimin si nga kristianofobia, ashtu edhe nga islamofobia, dmth si nga urrejtja
kundër të krishterëve, ashtu edhe nga ajo kundër myslimanëve. E kjo, sepse njeriu
nuk duhet të ketë frikë ta praktikojë lirisht fenë e vet, ashtu si nuk duhet ta përdorë
fenë për të përligjur luftërat dhe interesat politike e ekonomike. Edhe delegatët
dëgjues në Sinod, si përfaqësuesit e Fokolarinëve, të Lëvizjeve Neokatekumenale dhe
të Bashkësisë së Shën Egjidit, sjellin përvojën e tyre, duke ripohuar rëndësinë e
pranisë së krishterë në vendet islamike dhe veprimtarinë e saj në promovimin e paqes
e të bashkimit. Jetik edhe bashkëpunimi me shekullarët, nevoja për t’u ofruar të
sëmurëve e grave mundësinë të zbulojnë misionin e tyre në Kishë e në Botë, si edhe
detyra e edukimit të rinisë me frymën e vëllazërmit, të pranimit të tjetrit, pavarësisht
nga ndryshimet. Në këtë drejtim një rol të rëndësishëm mund të luajë leximi i letërsisë
arabo-kristiane. Shikimi i Sinodit përfshin edhe dramën e tmerrshme të të krishterëve
në Irak, ku vijon një fushtaë e hapur për t’i dëbuar nga vendi. Ipeshkvijtë i kërkojnë
bashkësisë ndërkombëtare t’i japë fund heshtjes për këtë fushatë e edhe për situatën
e vështirë të Kishës në Turqi, e cila shpesh injorohet, duke rrezikuar vetë praninë
e krishterë në këtë vend, ku historia u shkrua edhe me gjakun e martirëve, si imzot
Luigji Padoveze, vikar-apostolik i Anatolisë, vrarë me paramendim qershorin e kaluar,
nga të njëjtat forca, që shkaktuan vdekjen e don Andre Santoros e të gazetarit armen,
Dink. Thamë më lart se në Sinod folën edhe dy të dërguar të posaçëm të myslimanëve.
Të dëgjojmë fjalët e shiitit Ahmadabadi: “Mutual understanding
between religions... Mirëkuptim reciprok ndërmjet feve. Ky është filli
i artë i diskutimeve, mbajtur nga dy përfaqësuesit e Islamit për të përshkruar marrëdhëniet
ndërmjet të krishterëve e myslimanëve. Posaçërisht përfaqësuesi i shiitëve ripohoi:
stabiliteti në botë mund të arrihet vetëm në se të gjithë jetojnë pa frikën e tjetrit.
Është, prandaj, themelore që besimtarët e të gjitha feve t’i kërkojnë pa turp e pa
frikë të drejtat e tyre. Natyrisht, vijoi i dërguari i posaçëm i Islamit, në të kaluarën
ka pasur edhe çaste tejet të errta në marrëdhëniet ndërmjet të krishterëve e myslimanëve.
Madje edhe sot e kësaj dite vërehen qëndrime krejt të gabuara, por nuk duhet harruar
se ka edhe vende islamike, në të cilat të krishterët jetojnë gju më gju me myslimanët.
E kjo është edhe rruga që duhet ndjekur. Kështu përfaqësuesi i shiitëve, ndërsa
suniti Al-Samak theksoi: “Jam njëmendjeje me përfaqësuesin sunit: e ndajmë bashkë
vuajtjen e të krishterëve e tani jemi të thirrur të punojmë së bashku, të respektojmë
detyrat e të drejtat e, sidomos, të luftojmë kundër fanatizmit, duke promovuar kulturën
e miqësisë e të faljes. Të gjithë duhet ta kenë mirë parasysh se në Lindjen e Mesme
prania e krishterë, që punon në bashkëpunim me Islamin, është e nevojshme për mbarë
botën".