Nga Sinodi, urimi për një agim të ri në Lindjen e Mesme
(12.10.2010 RV)Një agim i ri në Lindjen e Mesme: është urimi, që u shpreh sot
paradite nga Sinodi i Ipeshkvijve për rajonin, i cili po vazhdon që nga e diela në
Vatikan mbi temën e “bashkimit e të dëshmisë”. Gjatë mbledhjes së tretë të përgjithshme,
në praninë e Papës Benedikti XVI, etërit sinodalë treguan vëmendje për gjendjen në
Irak, duke kërkuar fundin e konflikteve. Sot, u zgjodhën edhe anëtarët e Komisionit
për Mesazhin përfundimtar.
Por të kthehemi tek punimet. Në veçanti, Iraku.
Pa dialog, thonë ipeshkvijtë, nuk do të ketë paqe e qëndrueshmëri. Duhet të bashkohen
të gjitha zërat për të denoncuar biznesin e madh ekonomik të tregtisë së armëve. E
akoma: të krishterët duan të jetojnë në paqe e liri, e mërgimi, që quhet vdekjeprurës,
është një sfidë e rëndësishme për t’u përballuar. Në asamblenë e përgjithshme u
fol edhe për Afganistanin, megjithëse nuk bën pjesë në vendet pjesëmarrëse në Sinod,
duke mos qenë i Lindjes së Mesme. Etërit sinodalë shprehën solidaritetin e tyre me
popullsinë e vendit dhe i bënë thirrje bashkësisë ndërkombëtare të rishikojë gabimet
historike të bëra në zonë e në Lindjen e Mesme. Ipeshkvijtë shprehën gatishmërinë
e tyre për bashkëpunimin ndërmjet Kishave të Lindjes së Mesme e atyre të Magrebit
e kërkuan edhe ndihmën e mas mediave për të përhapur nocione si qytetaria, barazia,
pranimi i ndryshueshmërive, duke shmangur manipulimin e njerëzve dhe nxitjen e ekstremizmit. Sinodi
foli më pas për dialogun ndërmjet të krishterëve e myslimanëve, parë si pasurim i
ndërsjelltë: nga Islamizmi, të krishterët mund të mësojnë si të jenë më praktikantë
të fesë, ndërsa afërsia e tyre me Ungjillin i bën myslimanët të reflektojnë në mënyrë
kritike mbi Kuranin. Në këtë kuadër, etërit sinodalë kritikuan nismat provokuese ndaj
Islamit, si karikaturat apo djegjet e Kuranit, ndërsa nga ana tjetër, inkurajuan aktivitetin
e skautëve, ku mund të marrin pjesë të rinj të të gjitha feve. “Është urgjente – tha
kardinali Anxhelo Sodano, dekani i kolegjit kardinalor – të favorizohet zgjidhja e
konfliktit izraelito-palestinez e të kërkohet respektimi i lirisë fetare për të gjithë
besimtarët. Duhet punuar që të ndalen rrymat agresive të Islamit”. Më pas, të dhënat
mbi edukimin e arsimimin: në Lindjen e Mesme, Kisha Katolike ka rreth njëmijë institucione
shkollore me 600 mijë nxënës, katër universitete, tetë institute të larta kishtare
e së paku, 10 seminare të riteve të ndryshme. Jashtëzakonisht të vlerësuara, këto
qendra ua hapin dyert edhe të varfërve. Ipeshkvijtë theksuan edhe rëndësinë e pjekurisë
së fesë së laikëve, të cilët duhet ta njohin e ta ndjekin thirrjen e tyre personale.
E njëjta gjë u nënvizua edhe për lëvizjet kishtare dhe për bashkësitë e reja, mbështetje
e çmuar në gjallërimin e ungjillëzimit. Një çast i veçantë iu kushtua sekteve. Vetëm
në Jordani, për shembull, janë të pranishme pesëdhjetë. Në këtë kuadër, u kërkua më
tepër kujdes për familjet dhe rishikimi i librave të katekizmit. Së fundi, disa propozime:
të krijohen Komisione për dialogun ndërfetar në Lindjen e Mesme; të lehtësohen procedurat
për zgjedhjen e Patrikëve dhe; të krijohet një listë me meshtarë të gatshëm për të
shkuar në rajon.