Paqja dhe drejtësia, të domosdoshme për Lindjen e Mesme: kështu Papa në Meshën e hapjes
së Sinodit për rajonin
(11.10.2010 RV)Të gjithë njerëzit kanë të drejtë të jetojnë me dinjitet në
atdheun e tyre e aty, duhen favorizuar kushte paqeje e drejtësie: kjo është thirrja
e Papës Benedikti XVI në Meshën, që hapi dje në Bazilikën e Shën Pjetrit në Vatikan,
Sinodin e ipeshkvijve për Lindjen e Mesme. Në qendër të homelisë së Papës, edhe dialogu
konstruktiv me hebrenjtë e myslimanët. Ungjilli u lexua në latinisht e në greqisht,
ndërsa gjatë lutjeve të besimtarëve u urua që shteti ta shfrytëzojë pozitivisht laicitetin
e vet dhe të promovojë të drejtat e njeriut. Asambleja Sinodale për Lindjen e Mesme
do të vazhdojë në Vatikan deri më 24 tetor e do të refletojë mbi temën e “bashkimit
e të dëshmisë”.
Papa i quajti popullsitë e Lindjes së Mesme një “pjesë e Popullit
të Zotit, fort e çmuar dhe e dashur”. Një tokë, që ka përjetuar ngjarje të vështira
e konflikte, por “Zoti i historisë”, theksoi Benedikti XVI, ka siguruar vazhdimësinë
e pranisë së krishterë në këto vise: “Këtë rajon të botës, Zoti e sheh nga
një perspektivë e ndryshme, do të thoshim “nga lart”: është toka e Abrahamit, e Isakut
dhe e Jakobit; toka e eksodit dhe e kthimit nga mërgimi; toka e tempullit dhe e profetëve;
toka, ku Biri i Vetëm i Hyjit lindi nga Maria, ku jetoi, vdiq dhe u ringjall; djepi
i Kishës, së krijuar për ta çuar Ungjillin e Krishtit deri në kufijtë e botës. Edhe
ne, si besimtarë, e shohim Lindjen e Mesme në perspektivën e historisë së shëlbimit”. Kisha,
vazhdoi Papa, është themeluar për të qenë në mes të njerëzve, shenjë e mjet i planit
të vetëm e të gjithanshëm shëlbues të Zotit. Kjo është perspektiva, nga e cila duhet
ta shohim Lindjen e Mesme: “Ta shohim atë pjesë të botës në perspektivën e
Zotit do të thotë të shohim në të ‘djepin’ e një plani universal të shpëtimit përmes
dashurisë, misterin e bashkimit, që realizohet në liri e prandaj, u kërkon njerëzve
përgjigje”. Ati i Shenjtë kujtoi më pas temën e Sinodit të ipeshkvijve, kushtuar
bashkimit e dëshmisë: “Pa bashkim nuk mund të kemi dëshmi: dëshmia më e madhe
është pikërisht jeta në bashkim…Ky bashkim është vetë jeta e Zotit, që na komunikohet
nga Shpirti Shenjt, përmes Jezu Krishtit. Është pra, dhuratë, jo diçka që duhet ta
ndërtojmë me forcat tona. E pikërisht për këtë, ka të bëjë me lirinë tonë e kërkon
përgjigje prej nesh: bashkimi kërkon gjithnjë kthimin e zemrave, si dhuratë që duhet
pranuar e duhet vënë në jetë gjithnjë e më mirë”. Sinodi i ipeshkvijve është
një moment i privilegjuar për të përtërirë hirin e Rrëshajve, që Lajmi i Mirë të shpallet
e të pranohet nga të gjithë. Prandaj është e rëndësishme të kuptohet qëllimi i Asamblesë
sinodale, theksoi Papa: “Qëllimi i kësaj Asambleje sinodale është kryesisht
baritor. Megjithëse nuk mund ta lenë mënjanë gjendjen shoqëroro-politike delikate
e nganjëherë dramatike në disa vende, Barinjtë e Kishave të Lindjes së Mesme dëshirojnë
të përqendrohen në aspektet e misionit të tyre… Ky është edhe rasti për të vazhduar
dialogun konstruktiv me hebrenjtë, me të cilët na lidh pazgjidhshmërisht historia
e gjatë e Besëlidhjes, njësoj si me myslimanët”. Duke uruar që, në nivelin
personal, familjar dhe shoqëror, besimtarët të ndjejnë gëzim për faktin se jetojnë
në Tokën Shenjte e të jenë të vetëdijshëm se shërbejnë si gurë të gjallë të Kishës
në Lindjen e Mesme, megjithë vështirësitë, Papa u drejtoi një thirrje të fuqishme
përgjegjësve të gjendjes aspak të lehtë të rajonit: “Të jetosh me dinjitet
në atdheun tënd është para së gjithash, një e drejtë njerëzore themelore: prandaj,
duhen favorizuar kushtet për paqen e drejtësinë, të domosdoshme për zhvillimin e të
gjithë banorëve të zonës. Të gjithë janë të thirrur të japin kontributin e tyre: bashkësia
ndërkombëtare, duke mbështetur rrugën e besueshme, të qëndrueshme e konstruktive drejt
paqes; fetë mazhoritare në rajon, duke nxitur vlerat shpirtërore e kulturore, që bashkojnë
njerëzit e përjashtojnë çdo shprehje dhune. Të krishterët do të vazhdojnë të japin
kontributin e tyre jo vetëm me vepra shoqërore, si institutet e arsimit e të shëndetësisë,
por sidomos me frymën e Lumnive ungjillore, që i japin jetë praktikës së faljes e
pajtimit”. Në fund, Benedikti XVI ia besoi punimet e Sinodit për Lindjen e
Mesme, Zojës së Bekuar, duke bërë edhe një herë thirrje për paqe.