Ati i Shenjtë Benedikti XVI hapi sot në Vatikan punimet e Asamblesë së Veçantë të
Sinodit të Ipeshkvijve për Lindjen e Mesme.
Punimet e Sinodit do të zhvillohen deri më datën 24 tetor e 185 Etër sinodal, mes
të cilëve 9 patriarkë, 19 kardinaj, 65 kryeipeshkvij, 10 kryeipeshkvij titullar, që
përfaqësojnë 5.707.000 katolikë të pranishëm në 18 Vende të Lindjes së Mesme, do të
flasin mbi temën: “Kisha Katolike në Lindje të Mesme: bashkimi e dëshmia. “Turma e
besimtarëve kishte një zemër e një shpirt të vetëm (Vp 4,32)”. Në Sinod marrin
pjesë si Delegatë vëllazëror, përfaqësues të 13 Kishave e bashkësive të krishtera
historikisht mirë të rrënjosura në Lindje të Mesme. “Prania e tyre – tha sekretari
i Sinodit të ipeshkvijve imzot Eteroviç – është shenjë e qartë e vullnetit për të
ecur përpara në dialogun ekumenik që ka arritur shumë rezultate pozitive e posaçërisht
në këtë rajon”. “Lindja e Mesme është shtëpia edhe e vëllezërve e motrave të fesë
hebraike e islame”, theksoi imzot Eteroviç duke njoftuar për praninë e përfaqësuesve
të hebrenjve e të islamit sunitë e shiitë në Sinod, si rabini David Rosen, Drejtor
i Departamentit për Çështjet Ndërfetare të American Jewish Committee, si suniti Muhammad
al-Sammak, Këshilltar politik i Myftiut të Madh të Libanit e si shiiti Ayatollah Seyed
Mostafa Mohaghegh Ahmadabadi, Anëtar i Akademisë Iraniane të Shkencave. Ndër gjuhët
zyrtare të këtij Takimi Sinodal, në të cilat do të përkthehen të gjitha fjalimet e
ndërhyrjet, për herë të parë do të jetë edhe gjuha arabe – që flitet nga 6 Kisha Lindore
Katolike, Kisha Kopte, Kisha Siriane, Greko-Melkite, Maronite, Kaldeje dhe Armene
- e hebraike.