Imzot Çulikat në OKB: burimet financiare të armatimeve të shkojnë për luftën kundër
varfërisë.
(07.10.2010 RV)“Bashkësia ndërkombëtare duhet të marrë mbi vetë plotësisht
përgjegjësinë e luftës kundër varfërisë.” Kjo është thirrja që imzot Fransis Çulikat
bëri këto ditë në fjalën e tij mbajtur në Pallatin e Qelqtë në Nju Jork, mbi përdorimin
e burimeve në favor të drejtave të njeriut dhe të zhvillimit. Vëzhguesi i përhershëm
i Selisë Shenjte pranë OKB-së vuri në dukje se nga 2007-2009, pavarësisht nga kriza
ekonomike, shpenzimet për armatimet janë rritur me 15% në nivel botëror. Është kjo
një e dhënë që shqetëson, po qe se kemi parasysh se 1,4 miliard vetë në botë jetojnë
me më pak se 1.25 dollarë në ditë. Prandaj, vuri në dukje prelati, “mposhtja e varfërisë
nuk është diçka e pamundur nëse kombet ua japin fondet e destinuara për armë që sjellin
shkatërrim atyre që promovojnë jetën dhe zhvillimin.” Në veçanti, pohoi prelati,
duhet të luftohen ato programe zhvillimi që përfshijnë abortin. Më tej, imzot Çulikat
vuri në dukje se liria fetare është një e drejtë themelore dhe se duhet dënuar të
gjitha format e intolerancës fetare. Prandaj, përfundoi Imzot Çulikat, nuk mjafton
që të shtohen burimet financiare, por duhet rritur edhe respekti për besimin.