Benedikti XVI gazetarëve katolikë: ndihmojeni njeriun bashkëkohor të orientohet drejt
Krishtit
Benedikti XVI gazetarëve katolikë: Zoti të jetë në qendër të vlerave të tuaja dëshmuar
me pasion për të vërtetën. “Ndihmojeni njeriun e kohës sonë të drejtohet nga Krishti”.
Kështu iu drejtua Papa Benedikti XVI pjesëmarrësve në Kongresin Botëror të Shtypit
Katolik, ku morën pjesë përfaqësues nga 85 vende, pritur sot paradite në audiencë
në Vatikan. Papa i nxiti gazetarët katolikë ta vendosin Zotin gjithnjë e më shumë
në qendër të vlerave të vërteta dhe ta dëshmojnë të vërtetën me pasion dhe kompetencë.
Gjithashtu, Ati i Shenjtë iu tërhoqi vëmendjen të pranishëmve se ekziston rreziku
i ngatërrimit të realitetit me virtualitetin, gjë që mund të favorizohet nga teknologjitë
e reja të komunikimit. Fjalën përshëndetëse e mbajti kryetari i dikasterit për Komunikimet
Shoqërore që e organizoi kongresin, kryeipeshkvi Klaudio Maria Çeli: “Detyra
e juaj, të dashur veprimtarë të shtypit katolik, është të ndihmoni njeriun e sotëm
të drejtohet nga Krishti, Shpëtimtari i vetëm, dhe ta mbani ndezur nëpër botë, pishtarin
e shpresës, për ta jetuar denjësisht të sotmen dhe për ta ndërtuar si duhet të ardhmen.
Për këtë ju bëj thirrje ta përtërini papushim zgjedhjen tuaj personale në jetë për
Krishtin, duke u frymëzuar nga ato burime shpirtërore që mendësia mondane nënvleftëson,
e që përkundrazi, janë të nevojshme, madje të domosdoshme.” Papa përsëriti
se përballë shndërrimeve aktuale të thella në botën e komunikimit, shtypi katolik
duhet të impenjohet ditë për ditë të “ecë në rrugën kryesore të së vërtetës.”: “Kërkimi
i së vërtetës duhet të kryhet nga gazetarët katolikë me mendje dhe zemër të pasionuar,
por edhe me profesionalizmin e veprimtarëve kompetentë dhe të pajisur me mjetet e
përshtatshme dhe efikase. Kjo bëhet akoma më e rëndësishme, në këto çaste historike,
por që i kërkojnë edhe vetë personit të gazetarit, si ndërmjetësues i burimeve të
lajmeve, të kryejë një shndërrim të thellë.” Më pas Ati i Shenjtë Racinger,
u ndal tek pesha gjithnjë e më e madhe që ka figura, pamjet, pra, në botën e komunikimit.
Figura, tha ai, “mund edhe të bëhet e pavarur nga realiteti, mund të krijojë edhe
një jetë virtuale, me pasoja të ndryshme, e para nga të cilat është moskokëçarja përballë
së vërtetës.” Po ashtu Papa nënvizoi se teknologjitë e reja, bashkë me përparimin
që sjellin mund ta bëjnë të vërtetën të shkëmbyeshme me gënjeshtrën, mund të na shtyjnë
të ngatërrojmë realitetin me virtualitetin”: “Kapja e një
lajmi, qoftë i gëzuar apo i hidhërueshëm, mund të konsumohet si një shfaqje artistike
dhe jo si një rast për të reflektuar. Kërkimi i rrugëve për promovimin autentik të
njeriut kalon atëherë në plan të dytë, sepse ngjarja paraqitet kryesisht për të ngjallur
emocione. Këto tipare tingëllojnë si kambanë alarmi: na ftojnë ta konsiderojmë rrezikun
se virtualja mund ta shtyjë tutje realitetin dhe mund të na plogështojë në kërkimin
e së vërtetës.” Në këtë kontekst, pra, shtypi katolik është i thirrur “në një
mënyrë të re, t’i shprehë deri në fund fuqitë e tij dhe ta dëshmojë me fakte misionin
e tij prej të cilit nuk mund të heqë dorë. Papa pohoi më pas se për Kishën “mjeti
dhe lajmi përputhen plotësisht.”: Biri i Zotit, në fakt, është në të njëjtën kohë
“mesazh i shpëtimit dhe mjet përmes të cilit shpëtimi realizohet.” Është një realitet,
tha, “që mund ta shohim të gjithë” edhe ata që “ndonëse janë protagonistë në kompleksitetin
e botës, janë të aftë ta ruajnë ndershmërinë intelektuale individuale, tipike për
“të vegjlit” e Ungjillit. Në përfundim Papa ripohoi se sa e rëndësishme është për
Kishën sot sfida e komunikimit”: “Të krishterët nuk mund ta anashkalojnë krizën
e fesë që përjeton shoqëria, ose thjeshtë të besojnë se trashëgimia e vlerave që na
janë transmetuar përgjatë shekujve të kaluar të mund të vazhdojë të mbrujë të ardhmen
e familjes njerëzore. Ideja se mund të jetohet sikur Zoti të mos ekzistonte u pa se
është e gënjeshtërt: Përkundrazi, bota ka nevojë të jetojë “sikur Zoti të ekzistonte”
edhe atëherë kur nuk ka forcën të besojë, përndryshe, bota do të prodhojë vetëm një
“njerëzim çnjerëzor.” I pranishëm në audiencën me Papën Benedikti XVI ishte
edhe meshtari Dom Gjergj Meta që këto ditë mori pjesë në Kongresin Botëror të shtypit
katolik.