Takimi i Shën Egjidit në Barcelonë: “Të jetojmë sëbashku në kohë krize. Familja e
popujve, familje e Zotit”
(04.10.2010 RV)Dita e dytë e takimit të organizuar nga shën Egjidi mbi “Njerëzit
e fenë”, që sivjet bëhet në Barcelonë të Spanjës. Tema, rreth së cilës po diskutojnë
pjesëmarrësit deri nesër, më 5 tetor, është “Të jetojmë sëbashku në kohë krize. Familja
e popujve, familje e Zotit”. Lindja e Mesme, Afrika, Evropa: tre pikat themelore
të këtij takimi paqeje, që filloi në Asizi, me Gjon Palin II, në vitin 1986, venë
në dukje se kultura e luftës, mbrojtur me zjarr pas atentateve të 11 shtatorit 2001,
nuk solli paqen, edhe kur e pati këtë qëllim. Dialogu, që atëherë dukej si i rrezikshëm,
sot është mëse i nevojshëm për një botë, e cila përndryshe do të ishte më e keqe.
Themeluesi i bashkësisë së Shën Egjidit, Andrea Rikardi vërejti në takim, se është
e nevojshme të rindërtohet familja e qytetërimeve dhe e feve të ndryshme, të ripohohet
dinjiteti i ndryshimeve, që nuk duhet të dramatizohen kurrë, sepse, pavarësisht se
kjo mund t’u shërbejë politikanëve për zgjedhjet, mund të bëhet një lojë tepër e rrezikshme.
E këtu hyjnë edhe qëndrimi ndaj romëve e ndaj emigrantëve në Evropë, integrimi i të
cilëve, sipas Rikardit, duhet bërë me inteligjencë e me guxim për të ndërtuar një
botë, që të jetë vërtet familje e popujve. Në mesazhin e djeshëm, në hapje të
konferencës, Papa thekson pikërisht këtë: “Në një kohë të vështirë krize e konfliktesh,
fetë janë të thirrura të realizojnë vokacionin e tyre të veçantë në shërbim të paqes
e të bashkëjetesës”.