ኤኳዶር፣ ፈተነ ዕላዋ መንግሥቲ

ኣብ ኤኳዶር ኣባላት ሓይሊ ጸጥታ መንግሥቲ ዘጽደቖ ናይ ደሞዝ ቅነሳ ውሳኔ በምቅዋም ቅድሚ ትማሊ ዓቢ ናይ ተቓውሞ ሰልፊ ብምክያድ ፈተነ ዕልዋ መንግሥቲ ከምዘካየዱ እንክሕበር፣ ናይታ ሃገር ርእሰ ብሔር ኮሬኣ ንዝተወሰነ ሰዓት ኣብ ርእሰ ከተማ ኪቶ ኣብ ዝርከብ ዓቢይ ቤተ ሕክምና ተዘሪዖም ኣብ ጽንኵር ኵነት እንከለዉ ሓይሊ ምክልኻል ብዝፈጸሞ መብረቓዊ መጥቃዕቲ ናጻ ከምዝወጹን በቲ ተኸሲቱ ዝነበረ ውጥረት ክልተ ሰባት ናይ ሞት ልዕሊ 30 ዝግመቱ ድማ ናይ መቝሰልቲ ሓደጋ ከዝወረዶም ተገሊጹ።

ርእሰ ብሔር ኮረኣ ኣቲ ተኸስቱ ዝነበረ ሁከትን ቅልውላውን ኣብ ትሕቲ ቁጽጽር ከምዝኣተወን እንክገልጹ፣ በቲ ሓይሊ ጸጥታ ብዝፈጸምዎ ናዕቢ ጠንቂ ናይ ሓይሊ ጸጥታ ዋና ኣዛዚ ፍረድይ ማርቲነዝ ብገዛእ ፍቓዶም ኃላፍነቶም ከምዘረከቡ ተገሊጹ።

እዚ ከምዚ ኢሉ እንከሎ ናይ ኤኳዶር ብፁዕና ጳጳሳት ቤት ምኽሪ በቲ ኣብ ሃገሮም ተኸሲቱ ዘሎ ጨንፈር ብዙሕ ቅልውላው፣ ሓቀይና ናይ ዘተ ከይዲ ክፍጠርን ኣብ መላእ ሃገር ሰላማዊ ናይ ሓባር ናብራ መታን ክረጋገጽ፣ መንግሥትን ሕዝባዊ ባይቶን ተነጺሎም ሓደኣዊ ውሳኔታት ካብ ምትሕልላፍ ፈተና ተቖጢቦም፣ እቲ ሓቀይና ሥርዓት ዴሞክራሲ ዘረጋገጽ ናይ ሕዝቢ ተሳትፎን ሰላምን ናይ ሓባር ዘተን ሉኣላዊነት ሕጊ ውሑስ ዝገብር ከይዲ ፖለቲካ ምዃኑ ብፁዓን ጳጳሳት ብምምልካት መንግሥትን ሕዝባዊ ባይቶን ሓጋጊ ባይቶን እዚ መገዲ ክኽተል ከምዘተሓሳሰቡ ተገሊጹ።