Վիքթոր Համբարձումեանի Անուան Միջազգային Մրցանակ՝ Զուիցերացի Աստղագէտ Միշել Մայորին։

17 սեպտեմբեր 2010-ին Հայաստանի նախագահ Սերժ Սարգսեան Հայաստանի Գիտութիւններու ազգային ակադեմիայի արտահերթ ընդհանուր ժողովի ընթացքին, որուն մասնակցած են տարբեր երկիրներէ ժամանած հեղինակաւոր գիտնականներ, զուիցերիացի յայտնի աստղագէտ Միշել Մայորին եւ անոր գիտական խումբի անդամներ Գարիկ Իսրայէլեանին եւ Նունօ Սանթոսին յանձնուած է ակադեմիկոս Վիքթոր Համբարձումեանի անուան միջազգային մրցանակը։ Մրցանակը հիմնուած է Հայաստանի նախագահին 16 ապրիլ 2009-ի հրամանագիրով, որ նպատակ ունի յաւերժացնել մեծ աստղագէտին յիշատակը եւ խթանել անոր գիտական ժառանգութեան զարգացումը։
Մրցանակը կը շնորհուի երկու տարին անգամ մը՝ աստղագիտութեան եւ յարակից բնագաւառներու մէջ ակնառու գիտական աշխատանքի համար։ Մրցանակային ֆոնտը 500 հազար ամերիկեան տոլար է։