Papa i surprizave: sekretari i Benediktit XVI tregon për Atin e Shenjtë në “L’Osservatore
Romano”
Për sekretarin e tij, don Georg Genshvain, Papa Benedikti XVI, gjatë pesë vjetëve
të papnisë, ka ditur të paraqitet si “papë i surprizave”. Kështu shkruan në librin,
që ai vetë e ka përgatitur, e që titullohet “Benedikti XVI urbi et orbi: me Papën
në Romë e nëpër rrugët e botës”, botuar nga Shtëpia Botuese e Vatikanit, për të cilin,
don Genshvajn mori më 25 shtator, në Anakapri, çmimin “Kapri Shën Mëhilli 2010”. Në
fjalën që mbajti me rastin e dhënies së çmimit, botuar në gazetën “L’Osservatore Romano”,
don Georg nënvizon se Papa na ka habitur të gjithëve: “së pari për lehtësinë me të
cilën mori përsipër detyrën e paraardhësit të tij Gjon Pali II, duke e interpretuar
në një mënyrë të re, por gjithnjë plot gjallëri… Njëkohësisht – vazhdon sekretari
personal i Papës – na ka habitur fakti se prefekti i Kongregatës për Doktrinën e Fesë,
me ngrohtësinë e thjeshtësinë e tij, kaq të natyrshme dhe të vërtetë, arrin, pa ndonjë
përpjekje të madhe, të fitojë zemrat e njerëzve”. Sipas don Georgut, i papritur
ishte edhe guximi, që qartësisht karakterizon papninë e Jozef Racinger. Benedikti
XVI nuk u largohet debateve e konfrontimeve, i quan me emër mungesat e gabimet e Perëndimit,
kritikon dhunën, që pretendon të justifikohet me anë të fesë, nuk pushon së na kujtuari
se me hedonizmin dhe relativizmin, si edhe me imponimin e fesë me dhunë e kërcënime,
i kthejmë krahët Zotit. Në qendër të shqetësimeve intelektuale të Papës qëndron çështja
e marrëdhënieve ndërmjet fesë e arsyes; ndërmjet fesë dhe largimit nga dhuna. Për
Benediktin XI, shkruan don Genshvajn, “riungjillëzimi i Evropës dhe i krejt botës
do të jetë i mundur vetëm kur njerëzit ta kuptojnë se feja e arsyeja nuk janë në kontrast,
por në marrëdhënie ndërmjet tyre. Feja, që nuk matet me arsyen, bëhet e parsyeshme
e pa kuptim. E anasjelltas, konceptimi i arsyes si diçka, që njeh vetëm ç’mund të
matet, nuk mjafton për të kuptuar krejt realitetin. Arsyeja i lë hapësirë fesë e feja
duhet të dëshmojë arsyen, që të dyja të mos kufizohen në horizontin e ngushtë vetjak.
Në fund të fundit, Papës i intereson të ripohojë bërthamën e fesë së krishterë: dashuria
e Zotit për njeriun, që gjen në vdekjen në kryq të Jezusit e në ngjalljen e Tij shprehjen
e vet të pakrahasueshme”. “Megjithëse sytë e telekamerat drejtohen nga Papa –
përfundon don Georg Genshvajn, sekretari i Benediktit XVI – nuk është fjala vetëm
për të. Ati i Shenjtë nuk vë kurrë në qendër vetveten, nuk shpall vetveten, por Jezu
Krishtin, shëlbuesin e vetëm të botës”.