Сёння адбудзецца пахаванне
монсіньёра Елеўтэрыё Фарціні, падсакратара Папскай рады спрыяння хрысціянскаму адзінству,
які памёр у Рыме 22 верасня. Ён таксама з’яўляўся архімандрытам епархіі Лунгро (Калабрыя)
Італа-Албанскай грэка-каталіцкай Царквы. Архім. Елеўтэрыё нарадзіўся 2 красавіка
1938 г. у гарадку San Benedetto Ullano ў Калабрыі. Падрыхтоўку да святарства праходзіў
у Папскай Грэцкай Калегіі і святарскае пасвячэнне 24 лістапада 1963 г. Ад часу
ІІ-га Ватыканскага Сабору працаваў у Папскай Радзе (раней: Сакратарыяце) спрыяння
хрысціянскаму адзінству, дзе шмат гадоў нёс служэнне падсакратара. Разам з працай
ў Ватыкане архімандрыт Елеўтэрыё з’яўляўся душпастырам для рымскай італа-албанскай
парафіі (пры храме св. Афанасія) і падтрымліваў развіццё візантыйскай традыцыі і італа-албанскай
культуры. З вялікай дабразычлівасцю памерлы архімандрыт Елеўтэрыё адносіўся да
Касцёла ў Беларусі. Ён добра ведаў біскупа Чэслава Сіповіча, протаіерэя Аляксандра
Надсана а таксама беларускіх студэнтаў Грэцкай Клегіі. Ён шматразова служыў як
кансультант біскупа Віцебскага Уладзіслава Бліна і Апостальскага Візітатара для грэка-католікаў
Беларусі архімандрыта Сяргея (Гаека). Пахавальныя урачыстасці архімандрыта Елеўтэрыя
адбудуцца сёння ў грэцкім храме св. Афанасія Вялікага у Рыме. Пахавальная літургія
адбудзецца ў нядзелю 26 верасня 2010 г. у парафіяльным храме ў родным італа-албанскім
гарадку San Benedetto Ullano.