Sot e diel 26 shtator, Kisha kremton të dielën e 26-të gjatë vitit kishtar
e po më 26 shtator kalendari përkujton edhe shenjtorët Kozmaj e Damjani, martirë
dhe shën Nilin, abat, themelues i manastirit të Grottaferratës, afër Romës, në
të cilin jetojnë e veprojnë murgjërit e shën Bazilit, të ritit bizantin. Ndër këta
murgjër të shën Bazilit, ka edhe shumë arbëreshë.
Të hënën, më 27 shtator
, kalendari kishtar përkujton shën Vincenc de' Paolin, meshtar, themelues
i Kongregatës së Misioneve e të Bijave të Dashurisë, pajtor qiellor i të gjitha Shoqatave
të Bamirësisë. Festa e tij na tregon se Jezusi erdhi në botë për ta çliruar njeriun
nga shejtani. Fitorja e tij është e sigurtë, sepse ai është më i fortë. E si mund
të mos mbajmë anën e tij? Kush e gënjen veten se mund të luftojë i vetem, jo vetëm
që do të bjerë në kthetrat e së keqes, por nuk do të mund të çlirohet më prej saj. Të
martën më 28 shtator , kalendari kishtar përkujton shën Vençeslaun dukë i Bohemisë
dhe shën Lorencin Ruiz me shokë, martirë. Përballë lajmeve që dëgjon për Jezusin,
edhe Herodi mbetet me gojë hapur nga çudia. Për njerëzit e kohës, Krishti ishte profet
i së kaluarës, i ngjallur përsëri. Në se edhe ne mendojmë kështu, gënjehemi keqas
e rrezikohemi të mos e kuptojmë të renë që na sjell Jezusi, e cila nuk i përket një
kohe të caktuar, por të gjitha kohërave, deri në ditën e fundit të botës. Të
mërkurën e ardhshme, më 29 shtator, Kisha na fton të bashkojmë zërat në korin
e engjëjve në festën e Kryeengjëjve Mikelit, që do të thotë ‘Kush është si
Zoti’; Gabrielit që do të thotë ‘forca e Hyjit’ e Rafaelit që do të
thotë ‘ilaçi i Zotit’. Këta kryeengjëj na tregojnë se Hyji nuk na lë kurrë vetëm.
Kryeengjëjt, gjithnjë në prani të Zotit e gjithnjë gati për të shërbyer, janë provë
e ndihmës që Hyji ia ofron gjithnjë njeriut. Të enjten që vjen më 30 shtator
do të kremtohet festa e Shën Jeronimit, meshtar e doktor i Kishës, që i lutej
Zotit t’i jepte diturinë e vërtetë për të kuptuar si duhet Fjalën Hyjnore. Gjithnjë
të enjten kalendari kishtar përkujton edhe Shën Françesk Borgjia, jezuit. Të
premten më 1 tetor Kisha do të kremtojë Shën Terezën e Krishtit Fëmijë,
virgjër karmelitane, doktore e Kishës e pajtore e misioneve. Në liturgjinë e festës,
profeti na kujton se Zoti bën mrekulli, që ne mund të na duken të pamundura, ndërsa
më pas leximi i Ungjillit na siguron se për Zotin nuk ka asgjë të pamundur e se praninë
e tij e shikojmë vazhdimisht ndër fëmijët e në të gjithë njerëzit e pambrojtur. Të
shtunën më 2 tetor bie festa e Engjëjve të Rojës. Kjo e kremte na kujton se Zoti
dërgon engjëjt e tij për të na shoqëruar në çdo hap të jetës sonë. Engjëjt e Hyjit
mbrojnë posaçërisht më të vegjlit, ata që shoqëria i përbuz e i flak jashtë radhëve
të saj. Të dielën e ardhshme më 3 tetor, Kisha kremton të dielën e 27-të
gjatë vitit liturgjik, e po këtë datë kalendari kishtar përkujton edhe shën Kandiden,
martire. Festës së Shën Kandidës martire, na nxit të meditojmë për detyrën tonë si
të krishterë në ndërtimin e mbretërisë së Hyjit. Është thirrje themelore, që Jezusi
na e përsërit çdo çast, duke na kujtuar se kjo thirrje duhet të na nxisë t’i duam
të tjerët e jo ta ndjejmë veten më të mirë se ata.