Сёння літургічны ўспамін святога айца Піо з П’етрэльчыны
Просты законнік капуцын
падрэ Піо стаў вядомым і шанаваным дзякуючы дару містыцызму і стыгматам, якія ўпершыню
з’явіліся на яго целе 20 верасня 1918 года пасля чарговай няспыннай малітвы. Стыгматык
айцец Піо столькі маліўся, што некаторыя ягоныя біёграфы называюць яго чалавекам,
«які стаў малітвай».
У гэтым годзе 19 красавіка рэліквіі айца Піо былі перанесены
ў крыпту новай святыні, названай яго імем, у горадзе Сан Джавані Ратонда.
Будучы
святы нарадзіўся 25 мая 1887 года ў Паўднёвяй Італіі ў П’етрэльчыне. Бацькі назвалі
яго Франчэскам і далі яму глыбокае рэлігійнае выхаванне. У 1903 годзе Франчэско ўступіў
у навіцыят капуцынаў у Марконе пад імем Піо. Меў слабое здароўе, але гэта не стала
перашкодай для святарскага жыцця, якое распачаў у 1910 годзе.
Айцец Піо быў
чулы да духоўных і фізічных патрэбаў і цярпення людзей. На ахвяраванні, што прыносілі
яму вернікі, пабудаваў шпіталь, які назваў «Домам палёгкі ў цярпенні». Падчас яго
апошняй святой Імшы стыгматы на руках зніклі, а ў наступную ноч, 23 верасня 1968 года,
калі тысячы вернікаў сабраліся ў Сан Джавані Ратонда, каб адзначыць 50-тую гадавіну
стыгматаў будучага святога і прыняць удзел ў Міжнароднай канферэнцыі груп малітвы,
айцец Піо памёр.
2 мая 1999 года ён быў абвешчаны благаслаўлёным, а 16 чэрвеня
2002 года папа Ян Павел ІІ у Рыме ў прысутнасці соцен тысяч вернікаў абвясціў айца
Піо святым.
У Беларусі добра ведаюць святасць італьянскага капуцына. Парафя
св. Казіміра ў Маладзечне кожны аўторак запрашае пасля св. Імшы на няспынную навэнну
да святога айца Піо. Тут будуецца санктуарый у гонар святога.
Таксама парафія
ў Лёзне (Віцебская дыяцэзія) была названа ў гонар святога з П’етрэльчыны.