In memoriam: imzot Eleuterio Fortino Ngjallu o Zot e gjykoje botën
me dashuri
Banorët e Romës, që ngrihen herët në mëngjes për të bërë një shëtitje, të dielave,
në qendër të qytetit, në rrugën Babuino, e gjejnë gjithnjë hapur kishën e Shën Athanasit,
e deri pak javë më parë, nëse hynin, ndeshnin edhe vështrimin buzagaz e mikpritës
të një meshtari, që i ftonte të rrinin për kremtimin e Liturgjisë Hyjnore. Ai ishte
imzot Eleuterio Françesko Fortino, arkimandrit i eparkisë së Lungros në Kalabri, nënsekretar
i Këshillit Papnor për nxitjen e bashkimit ndërmjet të krishterëve. Lindur më
2 prill 1938 në San Benedeto Ulano të Kalabrisë, më 3 tetor 1958 hyri si seminarist
në Kolegjin Papnor Grek, ku vazhdoi studimet për filozofi e teologji deri sa u diplomua
në vitin 1964. Më 24 nëntor 1963 u shugurua meshtar. Që në ditët e para të Sekretarisë
së atëhershme për Bashkimin e të Krishterëve, bashkëpunoi ngushtë në punën për dialogun
vëllazëror e teologjik me Kishat e ndryshme të krishtera, jo katolike, sidomos me
ato lindore të traditës bizantine. Gjatë viteve, që jetoi e bashkëpunoi me Kolegjin
Papnor Grek, dolën në pah cilësitë e tij njerëzore e kristiane. Të bënte përshtypje
aftësia e tij për ta parë gjithnjë pozitivisht realitetin e Kishave të krishtera,
institucionet, faktet, personat, edhe në çastet më delikate të dialogut e madje, edhe
të ndeshjes. Ky pozitivitet lindte nga shpresa dhe vetëdija se përpjekjet njerëzore
për të arritur në takimin ndërmjet njerëzve e ndërmjet Kishave janë gjithnjë të udhëhequra
nga Dikush tjetër, i cili, kur dhe si të dojë, do të na çojë drejt asaj “ut unum sint”
(që të gjithë të jenë një). Dallohej menjëherë tek ai, dashuria për Kalabrinë,
nganjëherë e mundimshme, e sidomos afërsia me eparkinë e Lungros, nga vinte. Pavarësisht
nga distanca fizike dhe nga puna impenjative në Romë, e ndjente afër dhe ndiqte me
interes të përditshëm jetën e saj. Përkushtimi i tij u duk qartë në përgatitjen dhe
kremtimin e Sinodit II Ndëreparkial në Grotaferrata, mes viteve 2004 e 2005. Ishte
i sigurtë për rëndësinë e këtij takimi kishtar për jetën, vazhdimësinë e mbijetesën
e tri realiteteve kishtare lindore në Itali: eparkia e Lungros, Hora e Arbëreshëve
dhe manastiri hekzark i Grotaferratës. Përgatiste e kremtonte me dashuri Liturgjinë
e traditës bizantine dhe përpiqej ta bënte të njohur përmes botimeve, që u drejtoheshin
sidomos atyre, që nuk ishin të traditës bizantine, por që frekuentonin kishën e Shën
Athanasit në Romë, veçanërisht në çastet e mëdha të vitit liturgjik: në Javën e Madhe
e në Krishtlindje. Disa prej këtyre kremtimeve i përjetonte në një mënyrë krejt të
veçantë, krejtësisht të vetën. Për shembull, kremtimi i ngjalljes së Lazrit,
kur pas Mbrëmësores, mblidheshin seminaristët dhe eprorët e Kolegjit Papnor Grek,
me miq të tjerë të bashkësisë, për të kënduar “kalimera”-t e Lazrit në gjuhën arbëreshe.
Janë vargje që, me bukurinë e tyre poetike, sikur e shtyjnë me forcë Lazrin jashtë
varrit dhe krijojnë një ndjenjë të thellë pjesëmarrjeje tek ata që i këndojnë. Pavarësisht
nga vuajtjet dhe lodhja për sëmundjen, buzëqeshja dhe sytë e mallëngjyer nga emocioni
të imzot Eleuterios bënin gjithnjë përshtypje. I njëjti emocion, në mbrëmjen
e së Dielës së Larit, kur imzot Fortino mbante ikonën e Krishtit dhëndërr në takimin
dasmor me Kishën e tij. Apo në mbrëmësoren e së Shtunës së Madhe, që kremtohet në
mëngjesin e kësaj dite, gjatë së cilës tradita bizantine na fton të shijojmë gëzimin
e Pashkëve, imzot Fortino këndonte me shpirt Psalmin 81: “Ngjallu o Zot, gjykoje tokën…”
ndërsa e mbushte kishën me gjethet e dafinës, në pritje të “ditës së gëzueshme, që
e bëri Zoti”, për të kënduar me hare: “Krishti u ngjall së vdekurish, me vdekje
e mposhti vdekjen, dhe të vdekurve në varre u dha jetën”. I përjetshëm qoftë
kujtimi yt, o vëllai ynë i paharruar, i denjë për lumni. Amin!