Papa në katedralen e Uestminsterit: dhimbje e turp për shkandullin e abuzimeve seksuale.
Dita e tretë e vizitës apostolike të Papës Benedikti XVI në Mbretërinë e Bashkuar,
e para zyrtare e një pape në këtë vend. Të rëndësishme sot, fjalët e Atit të Shenjtë
për priftërinjtë pedofilë, që janë pasqyruar në të gjitha mediat botërore, por sidomos
Mesha në katedralen e Uestminsterit, paradite dhe mbrëmja e lutjes në Hajd Park,
para lumnimit të nesërm të kardinalit Xhon Henri Njuman, një nga arsyet e udhëtimit
të Papës në vendin anglosakson. Takime të tjera të ditës qenë ai me kryeministrin
David Kamerun, me zv.kryeministrin Nik Kleg, me kryetaren e opozitës, Harriet Harman
dhe me të moshuarit në Rezidencën e Shën Pjetrit, mbajtur nga Motrat e Vogla të të
Varfërve.
Dhimbje,
përvuajtëri, rinovim: këto janë ndjenjat e shprehura sot nga Papa, gjatë Meshës në
katedralen e Uestminsterit në Londër, ku foli edhe për abuzimet me të miturit brenda
Kishës Katolike. Benedikti XVI ia kushtoi homelinë vuajtjes njerëzore, që gjen shëlbim
në vdekjen e ngjalljen e Krishtit. Më pas përshëndeti të rinjtë e dioqezave të ndryshme
angleze, si edhe besimtarët e Uellsit, që nuk mundën ta takonin Papën në tokën e tyre.
Në kremtim ishin të pranishëm edhe primati anglikan, Rouan Uiliams dhe ish-kryeministri
britanik, Toni Bler. Në frymën e motos së udhëtimit “Zemra i flet zemrës”, Benedikti
XVI iu drejtua të gjithë atyre që vuajnë, u foli zemrave të atyre që i bashkojnë sakrificat
e tyre me ato të Hyjit. Para së gjithash, Papa përmendi vuajtjet e jashtëzakonshme
të shkaktuara nga abuzimi me fëmijët, sidomos nga ana e anëtarëve të Kishës: “U
shpreh sidomos dhimbjen time të thellë viktimave të pafajshme me shpresën që fuqia
e hirit të Krishtit, flijimi i tij i pajtimit, t’u sjellë shërimin e plagëve të thella
e paqen në jetën e tyre”. E akoma, më pas: “Me ju, pranoj e ndjej turpin
e përuljen, që të gjithë kemi vuajtur për shkak të këtyre mëkateve…Ju ftoj t’ia ofroni
Zotit me besim që ky ndëshkim të ndihmojë në shërimin e viktimave, në pastrimin e
Kishës e në ripërtëritjen e detyrës së saj shekullore të formimit e të kujdesit për
të rinjtë”. “Shpreh mirënjohjen - tha Papa - për përpjekjet që janë bërë për
ta përballuar këtë problem me ndërgjegje, e të gjithëve u kërkoj të tregojnë zell
e kujdes të madh për viktimat dhe solidaritet ndaj meshtarëve të pastër”. “Vuajtjet
tejet të mëdha”, që priftërinjtë pedofilë u kanë shkaktuar viktimave të tyre, bëjnë
pjesë në “sprovat e mundimet”, që ndeshim në jetën e Kishës e ndër to janë edhe ato
“të martirëve të çdo kohe”. E këtu Papa citoi, mes të tjerash, edhe ata “vëllezër
e motra në mbarë botën, që ende sot vuajnë e pësojnë diskriminime e persekutime për
shkak të fesë së tyre të krishterë”. Benedikti XVI foli gjatë homelisë, edhe për
“rolin e domosdoshëm” të laikëve katolikë në “çuarjen përpara të misionit të Kishës”
përmes “përpjekjeve për të shërbyer e për të qenë tharm i Ungjillit në shoqëri”.
Papa kujtoi thirrjen e Koncilit të II të Vatikanit drejtuar besimtarëve laikë: “Sa
nevojë të madhe ka shoqëria bashkëkohore për këtë dëshmi të laikëve! Sa shumë nevojë
kemi në Kishë e në shoqëri, për dëshmitarë të bukurisë së shenjtërimit, për dëshmitarë
të shkëlqimit të së vërtetës, për dëshmitarë të gëzimit e të lirisë, që lindin nga
marrëdhëniet e gjalla me Krishtin!”. Sipas Atit të Shenjtë, “një ndër sfidat
më të mëdha që sot duhet të përballojmë është si të flasim në mënyrë bindëse për urtinë
e fuqinë çlirimtare të Fjalës së Zotit në një botë, që tepër shpesh e shikon Ungjillin
si kufizim të lirisë njerëzore, në vend që ta shikojë si të vërtetë, që i çliron mendjet
dhe shndrit përpjekjet për të jetuar në mënyrë të mençur e të mirë, si individë dhe
si anëtarë të shoqërisë”.