Benedikti XVI ipeshkvijve të Brazilit: feja e njerëzve që ende është e paqartë, kërkon
ungjillëzim të ri për të takuar Krishtin e gjallë.
“Dialogu ndërmjet të krishterëve është imperativi i kohës sonë dhe përcaktim i pakthyeshëm
i Kishës”. Ky pohim i Papës Benediktit XVI, shpreh para grupit të ipeshkvijve katolikë
të Rajonit Verilindje 3 të Brazilit, gjatë audiencës së sotme në Pallatin apostolik
në Kastelgandolfo, në përfundim të vizitës së tyre ad Limina Apostolorum, është sintezë
e fjalimit që Papa u drejtoi prelatëve duke trajtuar problemin e largimit të shoqërisë
braziliane nga krishterimi dhe çështjen e riungjillëzimit. “Pesë shekuj më parë,
është kremtuar Mesha e parë në Brazil në rajonin tuaj”, lindur “nën mbrojtjen e Kryqit
të Shenjtë”. Kështu e filloi Benedikti XVI fjalimin e tij drejtuar grupit të ipeshkvijve
të rajonit Verilindje 3 të Brazilit, që përfshin afër 16 milionë banorë. Drita e atij
kujtimi premtues ka filluar të shuhet prej kohe, thotë haptas e sinqerisht Papa duke
folur mbi realitetin aktual të një popullsie të mbrujtur e të formuar në atë Dritë,
mirëpo sot, këto “vlera të fesë katolike”, besimtarët janë gjithnjë e më pak të prirur
t’i konsiderojnë si udhërrëfyese e stil të jetës: “Sot vërehet një ndikim në
rritje e sipër i elementeve të reja në shoqëri, që deri para pak dekadash ishin krejtësisht
të panjohura. Ky faktor provokon një braktisje konstante të jetës kishtare e madje
edhe të vetë Kishës,nga ana e katolikëve, derisa anën tjetër, në panoramën fetare
të Brazilit, shohim një përhapje të shpejtë të bashkësive ungjillore e neo-pentekostale”. Duke
u nisur nga ky realitet, Papa bëri një analizë të hollësishme rreth shkaqeve që janë,
vërejti ai, “në rrënjët e sukseseve të këtyre grupeve”, e që i përgjigjen “përhapjes
së etjes për Zotin” që kanë brazilianët. Mirëpo një sukses i tillë, vërejti Papa me
syrin kritik, është edhe tregues i “një ungjillëzimi, që në nivelin personal, shpesh
herë është sipërfaqësor”: “Faktikisht, të pagëzuarit që nuk janë të ungjillëzuar
në mënyrë të mjaftueshme, janë lehtë të ndikueshëm sepse e kanë fenë e brishtë dhe
shpesh të bazuar vetëm mbi përshpirtërinë e çiltër e të thjeshtë, e megjithatë, siç
thash, e ruajnë fenë e patundur e të gjallë. Nga fotografia që del në pah, në rend
të parë, vërehet nevoja që Kisha katolike në Brazil duhet të angazhohet në një ungjillëzim
të ri drejtuar njerëzve që e njohin pak apo aspak mesazhin ungjillor, e ata t’i sjell
në takimin e tyre personal me Jezu Krishtin e gjallë e veprues në Kishën e tij”.