Selia e Shenjtë kundër djegies së Kuranit: një gjest i rëndë e fyes.
Këshilli Papnor për Dialogun Ndërfetar e ka pritur me “shqetësim të madh” lajmin e
propozimit, bërë nga një komunitet ungjillor i Shteteve të Bashkuara të Amerikës,
të një Dite për djegien e Kuranit, “Koran Burning day”, caktuar për datën 11 shtator,
në ditën e përvjetorit të sulmeve tragjike terroriste që në vitin 2001 shkaktuan me
mijëra viktima e dëme të mëdha materiale. “Atyre akteve të dënueshme dhune - pohon
një komunikatë e dikasterit të Vatikanit - nuk mund t’u gjendet ilaçi me kundërvënien
e një gjesti fyes ndaj librit që konsiderohet i shenjtë nga një bashkësi fetare. Çdo
fe, me librat e shenjtë përkatës, me vendet e kultit dhe simbolet e veta, ka të drejtën
të respektohet e të mbrohet: këtu bëhet fjalë për një respektim të detyrueshëm ndaj
personave që aderojnë e për zgjedhjet dhe përcaktimet e tyre të lira në fushën e fesë”. “Reflektimi
i nevojshëm që u imponohet të gjithëve në përkujtimin e 11 shtatorit - vijon komunikata
- para së gjithash rinovon, ndjenjat tona të thella të solidaritetit me të gjithë
ata që janë goditur prej sulmeve të tmerrshme e të urryeshme terroriste. Këtyre ndjenjave
i bashkohet lutja jonë drejtuar Zotit për ata e për të dashurit e tyre që kanë humbur
jetën. Të gjithë përgjegjësit fetar e të gjithë besimtarët janë të thirrur të rinovojnë
edhe ata dënimin e prerë të çdo forme të dhunës, në mënyrë të veçantë atë që bëhet
në emër të fesë”. Gjon Pali II - kujton komunikata - ka pohuar se “përdorimi i dhunës
në emër të një besimi fetar është degjenerim e zvetënim i vet mësimeve të feve të
mëdha” (Fjalimi drejtuar Ambasadorit të ri të Pakistani, 17.12.1999), derisa Benedikti
XVI ka deklaruar që “mos tolerance e dhuna nuk mund të justifikohen kurrë me përgjigjet
ndaj fyerjeve, sepse nuk përputhen e as pajtohen me parimet e shenjta të feve” (Fjalimi
Ambasadorit të ri të Marokut, 20.02.2006). Nga ana e tyre përfaqësuesit e feve
të ndryshme në SHBA-së, mes të cilëve edhe kryeipeshkvi i Uashingtoni, kardinali Theodore
McCarrick, përmes një deklarate të përbashkët kanë dënuar ashpër propozimin e “Koran
Burninh Day” hedh në qarkullim nga një komunitet ungjillor i Floridës, duke denoncuar
me forcë atë që ata e quajnë “frenezi apo furi e papërmbajtur anti-myslimane”. “Nuk
është kjo Amerika e vërtet - tha kardinali McCarrick - nuk ka qenë kurrë e nuk duhet
të jetë kurrë. Atë që themi në këtë dokument është për ne, Amerika e vërtet është
një vend ku fetë janë të respektuara”.