Пачаўся Генеральны Капітул Місіянераў Аблатаў Марыі Беззаганнай
З 8 верасня па 8 кастрычніка
2010 г. у Рыме будзе працаваць Генеральны Капітул Місіянераў Аблатаў Марыі Беззаганнай.
Як адзначана ў Канстытуцыі супольнасці, «Капітул з’яўляецца прывілеяваным часам засяроджання,
роздуму і супольнага навяртання». «Аблат» — значыць «ахвяраваны», «ахвяраваны Марыі
Беззаганнай», каб, як Яна, несці Хрыста тым, каму Ён найбольш патрэбны: людзям духоўна
і матэрыяльна бедным, якім патрэбна надзея. У цэнтры духоўнасці аблатаў знаходзіцца
асоба Езуса Хрыста, таму кандыдаты ў супольнасць павінны асабліва любіць Укрыжаванага,
а кожны аблат — усімі сіламі Яго наследаваць.
Акрамя разгляду актуальных
пытанняў дзейнасці манаскай сям’і, дэлегаты з усіх куткоў свету здзейсняць абранне
новага генеральнага настаяцеля.
Супольнасць была заснавана ў 1816 г. з мэтай
адказу на выклікі, якія прынесла Французская рэвалюцыя. Сёння налічваецца больш за
4 тысячы членаў у 65-ці краінах свету. Харызмай кангрэгацыі зяўляецца прапаведаваннне
Божых праўдаў сваім сучаснікам. Дэвіз супольнасці ўключае словы з Евангелля: «...евангелізаваць
бедных жабракоў паслаў мяне Пан».
Праца Супольнасці адбываецца ў такіх напрамках,
як традыцыйнае душпастырства, евангелізацыя і дабрачыннасць.
На тэрыторыю Беларусі
аблаты прыбылі перад Другой сусветнай вайной. Яны працавалі на Гродзеншчыне: у Наваградку
і Вашкевічах. На жаль, ваеннае ліхалецце выгнала іх з месцаў душпастырскай працы.
Застаўся толькі айцец Войцех Навачык — пробашч з Наваградка. Нястомны аблат перажыў
савецкія лагеры ў Сібіры, пасля якіх, хворы, вярнуўся ў наваградскую парафію, дзе
і працаваў да самай смерці. Памёр ён ў 1984 г.
Чарговая старонка гісторыі аблатаў
на Беларусі адкрылася толькі ў 1992 годзе. Айцы аблаты апякуюцца парафіяй Св. Язафата
Кунцэвіча ў Шуміліне, што ў Віцебскай дыяцэзіі. Шумілінскаму касцёлу, між іншым, нададзены
тытул санктуарыя Маці Божай Фацімскай. Аблаты нясуць сваё служэнне таксама ў Мінска-Магілёўскай
архідыяцэзіі (Мінск, Астрашыцкі Гарадок, Калодзішчы, Каралёў Стан) і ў Гродзенскай
дыяцэзіі (в. Зарачанка, в. Селіванаўцы).
Адрозным знакам аблатаў з’яўляецца
вялікі крыж, які яны носяць на сутане. Рэгулы прадпісваюць, каб з гэтым крыжам у руцэ
законнікі складалі падзяку пасля Святой Камуніі, цалавалі яго, апранаючыся для цэлебрацыі
Эўхарыстыі і пасля яе заканчэння, а таксама давалі яго ў рукі пенітэнтам (тым, хто
пакаяўся) падчас сакрамэнту пакаяння.